BAKI, AzerVoice

İsrail ordusu Qəzzada "Magen Oz" dəhlizini tamamlamaqla Xan Yunisi bölür.

AzerVoice xəbər verir ki, İsrail ordusu Qəzza zolağının ikinci böyük şəhəri olan Xan Yunisini şərqdən qərbə ayıran 15 kilometrlik “Magen Oz dəhlizi”nin tikintisini başa çatdırdığını açıqlayıb.

Dəhliz Rəfah və Xan Yunisi ayıran Moraq dəhlizinə birləşir və bölgədə İsrailin hərbi əməliyyatlarına yeni istiqamət verir.

Ordunun məlumatına görə, quru və zirehli qüvvələrin iştirakı ilə açılan bu dəhliz Qəzzanın cənubundakı hərbi strategiyanın əsas elementlərindən biri kimi nəzərdə tutulur. Yerli KİV-lər bu addımı İsrailin Qəzza zolağını hissələrə bölmə planının bir hissəsi və atəşkəs danışıqları zamanı təzyiq vasitəsi kimi şərh edir.

Xatırladaq ki, İsrailin Qəzzadakı son hücumları nəticəsində aralarında uşaqların da olduğu 13 fələstinli həyatını itirib. Xəstəxana mənbələri və şahidlərin verdiyi məlumata görə, İsrail ordusu səhər saatlarında məcburi köçkünlərə sığınacaq verən ev və çadırları hədəfə alıb. Xan Yunisin Mavasi bölgəsində yerləşən çadır düşərgəsinə edilən hava hücumu nəticəsində üçü uşaq olmaqla səkkiz nəfər həlak olub. Nusayrat Qaçqınlar Düşərgəsində mənzil və qəhvəxanaya endirilən hava zərbəsi nəticəsində isə üç nəfər ölüb. Sabra məhəlləsindəki bir evə edilən hücumda daha iki nəfərin öldüyü bildirilir.

Digər tərəfdən, Qəzzada atəşkəs danışıqları hələ də davam edir. Qətər Xarici İşlər Nazirliyinin sözçüsü Məcid əl-Ənsari Dohada aparılan görüşlərin birbaşa deyil, ayrı-ayrılıqda keçirildiyini və prosesin hələ ilkin mərhələdə olduğunu bildirib. O, razılaşmanın ümumi çərçivəsi üzərində müzakirələrin aparıldığını, lakin detallar üzrə razılığın hələ əldə olunmadığını qeyd edib.

ABŞ prezidenti Donald Trampın Yaxın Şərq üzrə xüsusi nümayəndəsi Stiv Vitkoff və onun komandasının Dohaya səfəri gözlənilsə də, dəqiq tarix hələ açıqlanmayıb.

Qeyd edək ki, HƏMAS atəşkəs və əsir mübadiləsi razılaşması təklifinə müsbət cavab verib və danışıqlara açıq olduğunu bildirib. Lakin İsrail tərəfi Qətərin təklifində edilən bəzi düzəlişlərin qəbuledilməz olduğunu vurğulayıb. Müzakirələrə baxmayaraq, Təl-Əvivin Rəfah və Xan Yunisi ayıran Moraq və “Magen Oz” dəhlizləri üzərində nəzarəti davam etdirmək niyyətində israr etdiyi bildirilir.