BAKI, AzerVoice, Nailə Babazadə
Avropa Birliyi (AB) Xarici İşlər və Təhlükəsizlik Siyasəti Ali Nümayəndəsi Kaja Kallas Qəzzada atəşkəs planının uğur qazanması üçün beynəlxalq dəstəyin vacib olduğunu və Birliyin üzərinə düşəni etməyə hazır olduğunu açıqlayıb.
AzerVoice xəbər verir ki, Kallas Amerikanın X sosial media platformasında paylaşımında bu gün Yaxın Şərqdə “nadir görülən bir ümid anı”na şahidlik edildiyini qeyd edib.
İsrailli girovların azad olunmasını diplomatiyanın böyük uğuru və sülh yolunda “çox önəmli dönüm nöqtəsi” adlandıran Kallas, Qəzzada sülhün təmin olunmasının “son dərəcə mürəkkəb” olacağını vurğulayıb.
Atəşkəs planının uğur qazanması üçün beynəlxalq dəstəyin zəruri olduğunu bildirən Kallas, AB-nin bu sahədə üzərinə düşəni etməyə hazır olduğunu deyib.
AB-nin Refah Sərhəd Keçidindəki Sərhəd Yardım Missiyasının (EUBAM) 15 oktyabrda fəaliyyətə yenidən başlayacağını qeyd edən Kallas, bu missiyanın atəşkəsi dəstəkləməkdə önəmli rol oynaya biləcəyini vurğulayıb.
AB Komissiyası sədri Ursula fon der Leyen də X sosial media platformasında paylaşımında, israilli girovların azad olunmasının “yeni bir səhifənin açılması” demək olduğunu bildirib və Avropanın ABŞ, Qatar, Misir və Türkiyənin vasitəçiliyi ilə həyata keçirilən atəşkəs planına tam dəstək verdiyini qeyd edib.
Fon der Leyen “Bugün Şarm əl-Şeyxdə müharibənin sona çatdırılması ilə bağlı razılaşmanın yekunlaşması tarixi dönüm nöqtəsi olacaq. Bu razılaşmanın uğuruna əlimizdə olan bütün vasitələrlə dəstək verməyə hazırıq. Xüsusilə Fələstin idarəçiliyinin islahatı və idarəetmə sahəsində yardım göstərməklə” ifadələrini işlədib.
AB-nin Fələstin üçün qurduğu donor qrupunda fəal rol oynayacağını bildirən fon der Leyen, həmçinin Qəzzanın yenidən qurulması üçün vəsait təmin edəcəklərini vurğulayıb.
Refahdakı EUBAM missiyası 31 yanvarda İsrail ilə HƏMAS arasında atəşkəs razılaşması əldə olunandan sonra yenidən fəaliyyətə başlamışdı.
İsrailin Refah Sərhəd Keçidini bağlamasından sonra 18 martda bir sıra AB Komissiya üzvlərinin birgə açıqlamasında missiyanın heyət göndərə bilmədiyi və vəziyyəti izləmək üçün bölgədə qaldığı bildirildi.
AB 26 iyunda EUBAM və EUPOL COPPS missiyalarının fəaliyyət müddətini 30 iyun 2026-cı ilədək uzatma qərarı verib.
Qeyd edək ki,ABŞ Prezidenti Donald Tramp 9 oktyabrda Misirdə davam edən danışıqlarda İsrail ilə HƏMAS-ın Qəzzədə atəşkəs planının ilk mərhələsini təsdiqlədiyini elan etmişdi.
Danışıqların keçirildiyi Misirdə razılaşma imzalanarkən, İsrail hökumətinin təsdiqindən sonra 10 oktyabrın ilk saatlarında razılaşma qüvvəyə minib.
İsrailin Qəzza zolağına 8 oktyabr 2023-dən atəşkəs razılaşmasına qədər keçən müddətdə keçirdiyi hücumlarda 67 min 682 nəfər həlak olub, 170 min 33 nəfər yaralanıb.