BAKI, AzerVoice
Türk Dövlətləri Təşkilatının Aksakallar Şurası Şimali Kipr Türk
Cümhuriyyətində (KKTC) toplanır.
AzerVoice xəbər verir ki, bəzi Türk
Dövlətləri Təşkilatına (TDT) üzv dövlətlərin Cənubi Kipr Rum
Administrasiyasına səfir təyin etməsindən sonra TDT-nin Aksakallar
Şurasının toplantısının 2 may tarixində Şimali Kipr Türk
Cümhuriyyətində (KKTC) keçirilməsi qərara alınıb.
Qazaxıstan, Qırğızıstan, Özbəkistan və müşahidəçi üzv Türkmənistan son aylar Cənubi Kipr Rum Administrasiyasına səfir təyin edərək bu ölkədə rəsmi diplomatik təmsilçilik qurublar. Bu addımlar Aİ ilə Mərkəzi Asiya ölkələri arasında aprelin 4-də keçirilmiş birinci sammitə qədər baş tutub.
Mövzunu şərh edən TDT Aksakallar Şurasının sədri Binəli Yıldırım bildirib ki, son hadisələr fonunda şuranın iclasının KKTC-də keçirilməsi qərarı verilib. Onun sözlərinə görə, bu, Türk dövlətlərinin KKTC-yə verdiyi önəmin göstəricisidir.
Sözügedən dövlətlər müstəqillik əldə etdikləri dövrdə Cənubi Kipr Rum Administrasiyasını tanıyıblar. İndi isə həmin ölkələr Kiprdəki diplomatik fəaliyyətlərini birbaşa rəsmi nümayəndəliklər vasitəsilə həyata keçirməyə başlayırlar.
Eyni dövlətlər KKTC-nin Türk Dövlətləri Təşkilatı çərçivəsində müşahidəçi üzv kimi qəbul edilməsini dəstəkləyiblər. Bu, KKTC ilə münasibətlərə verilən əhəmiyyətin təsdiqidir.
Yıldırım qeyd edib ki, 2 mayda keçiriləcək iclasa Macarıstandan başqa bütün üzv ölkələrin nümayəndələri qatılacaq. Onun sözlərinə görə, Macarıstanın toplantıda iştirak etməməsi, Avropa İttifaqının üzvü olaraq Yunanıstan və Cənubi Kipr Rum Administrasiyasının mümkün reaksiyalarından ehtiyat etməsi ilə izah olunur.
Qeyd edək ki, Avropa İttifaqı son dövrlərdə Yunanıstan və Kipr Rum Administrasiyasına dəstəyini gücləndirib. Təşkilat bu ölkələrə verilən maliyyə yardımları və diplomatik təşəbbüslərlə Şərqi Aralıq dənizi regionunda təsirini artırmağa çalışır. Bəzi müşahidəçilər bu dinamikanı Türkiyə və Türk dövlətlərinin Aİ ilə münasibətlərində yeni mərhələyə keçmək istəyi fonunda strateji manevr kimi qiymətləndirirlər.