BAKI, AzerVoice

İranın nüvə yanacağı dövriyyəsinə sahib olmaq üçün tam hüququ var.

AzerVoice xəbər verir ki, bunu İranın xarici işlər naziri Seyid Abbas Araqçi X sosial şəbəkəsində etdiyi paylaşımında deyib.

Araqçi, Tehranın uzun müddətdir Nüvə Silahlarının Yayılmamasına dair Müqavilənin (NPT) iştirakçısı olduğunu xatırladıb.

“NPT-yə üzv bir çox ölkələr uranı zənginləşdirir və nüvə silahını tamamilə rədd edir” - deyə, o qeyd edib.

Bu müqaviləyə əsasən, iştirakçı ölkələr nüvə ehtiyatlarını bəyan etməli və onları Beynəlxalq Atom Enerjisi Agentliyinin (BAEA) nəzarətinə verməlidir.

Qeyd edək ki, ABŞ və digər Qərb ölkələri İranı nüvə silahı əldə etməyə çalışmaqda ittiham edir. Tehran isə bunu inkar edir və nüvə proqramının yalnız dinc məqsədlərlə istifadə edildiyini bildirir.

İran və ABŞ arasında Tehranın nüvə proqramı ilə bağlı danışıqlar aprelin 12-dən bəri aparılır. Bu danışıqlar, ABŞ prezidenti Donald Trampın 2018-ci ildə ABŞ-ı nüvə sazişindən çıxarmasından sonra bu mövzu üzrə ən yüksək səviyyəli danışıqlar sayılır.