BAKI, AzerVoice
Yeni aparılan beynəlxalq bir araşdırma, antibiotiklərin təsir etmədiyi infeksiyalar səbəbilə 2022-ci ildə 3 milyondan çox uşağın həyatını itirdiyini ortaya çıxarıb.
Avstraliyanın Murdoch Uşaq Araşdırmaları İnstitutundan Yanhong Jessika Hu və Clinton Sağlamlığa Çatım Təşəbbüsündən Herb Harwell-in rəhbərliyi ilə aparılan elmi araşdırmada xüsusilə Afrika və Cənub-Şərqi Asiyada uşaqların daha böyük risk altında olduğu bildirilib.
Alimlər ən ağır infeksiyalarda istifadə edilən antibiotiklərin istifadəsində ciddi artım olduğunu və bakteriyaların bu dərmanlara qarşı müqavimət (dirənc) inkişaf etdirdiyi təqdirdə, alternativ müalicə üsullarının olmadığını vurğulayıblar.
Ümumdünya Səhiyyə Təşkilatı (ÜST) və Dünya Bankı kimi qurumlardan toplanan məlumatlar, antibiotiklərə davamlı olan uşaq xəstəliklərinin son üç ildə 10 qat artdığını göstərir. Mütəxəssislər bu artımın əsas səbəblərindən birinin COVID-19 pandemiyası ilə əlaqəli ola biləcəyini qeyd edirlər.
Mikrobların antibiotiklərə qarşı müqavimət göstərməsi, dünya səhiyyəsi üçün ən ciddi təhdidlərdən biri hesab olunur. Bunun başlıca səbəbi kimi antibiotiklərin həddindən artıq və yanlış şəkildə istifadəsi göstərilir.
Digər tərəfdən, yeni antibiotiklərin hazırlanması da xeyli yavaşlayıb. Səbəb isə bu dərmanların istehsalının uzun müddət və yüksək maliyyət tələb etməsidir.
Bu gün Vyanada keçirilən bir elmi konqresdə araşdırmanın nəticələrini təqdim edən Prof. Herb Harwell bildirib:
“Antibiotik direnci qlobal bir problemdir və hər kəsi təsir edir. Biz bu araşdırma ilə göstərmək istədik ki, bu problem ən çox uşaqlara təsir edir. Dünya üzrə təxminən 3 milyon uşağın antibiotik direnci səbəbilə öldüyünü düşünürük.”
Harwell qeyd edib ki, gigiyena, təmiz suya çıxış və immunitetin gücləndirilməsi yolları ilə xəstəliklərin qarşısını almaq mümkün ola bilər və bu da antibiotik direncinə qarşı effektiv vasitədir.
BBC-yə danışan Dr. Lindsey Edwards isə bu nəticələrin qlobal
səhiyyə liderləri üçün bir “oyanış zəngi” olduğunu deyərək əlavə
edib:
“Əgər dərhal və ciddi addımlar atılmazsa, xüsusilə də dünyanın ən
həssas bölgələrində uşaqların sağlamlığı sahəsində illərlə əldə
edilmiş nailiyyətlər təhlükə altına düşə bilər.”
