BAKI, AzerVoice, Nailə Babazadə

Suriya ordusu Hələb vilayətində hökumət qüvvələri ilə kürdlərin rəhbərlik etdiyi qruplaşmalar arasında gərginliyin artması səbəbindən mülki şəxslərin ərazini tərk etməsi üçün humanitar dəhliz açacağını elan edib.

AzerVoice xəbər verir ki, ordunun rəsmi bəyanatına əsasən, mülki əhali cümə axşamı saat 09.00-dan 17.00-dək açılacaq dəhliz vasitəsilə təhlükəsiz bölgələrə keçə biləcək. Bu addım ordunun Hələb şəhərindən təxminən 60 kilometr şərqdə yerləşən Deyr Hafir və Məskənə qəsəbələrində genişmiqyaslı hərbi əməliyyatlara başlamağa hazırlaşdığının siqnalı kimi qiymətləndirilir. Suriya hərbçiləri Suriya Demokratik Qüvvələrini (SDG) və digər silahlı qrupları Fərat çayının şərqinə çəkilməyə çağırıb.

Məlumata görə, rəsmi Dəməşq SDG-ni Hələb şəhərinə dron hücumları təşkil etməkdə və bölgəyə əlavə qüvvələr toplamaqda ittiham edir. Ötən həftə Hələbdə baş verən toqquşmalarda 23 nəfər həlak olmuş, on minlərlə insan isə didərgin düşmüşdü. Suriyanın müvəqqəti prezidenti Əhməd əl-Şaraa televiziya müsahibəsində kürd xalqının haqlarını tanıdığını bildirsə də, SDG-ni əvvəlki razılaşmalara əməl etməməkdə və Hələbdə mülki əhalinin çıxışına mane olmaqda günahlandırıb.

ABŞ Mərkəzi Komandanlığının (CENTCOM) rəhbəri Bred Kuper tərəfləri maksimum təmkinli olmağa və mülki infrastrukturu qorumağa çağırıb. Vaşinqton tərəflər arasında danışıqlar masasına qayıtmağın vacibliyini vurğulasa da, son toqquşmalarda tərəf tutmaqdan yayınıb. SDG isə öz növbəsində gərginliyin artmasının regionda ağır humanitar və təhlükəsizlik fəsadlarına yol açacağı barədə xəbərdarlıq edib və baş verənlərə görə Dəməşqi məsuliyyətli tutub.