BAKI, AzerVoice, Nailə Babazadə

İsrail ordusunun Qəzza zolağına endirdiyi hücumlar nəticəsində son 48 saat ərzində daha 12 nəfər həlak olub, ümumi ölənlərin sayı 70 min 937-yə yüksəlib.

AzerVoice xəbər verir ki, Qəzzadakı Səhiyyə Nazirliyinin yaydığı yazılı açıqlamada İsrailin hücumları nəticəsində baş verən itkilər və dağıntılar altından çıxarılan meyitlərlə bağlı son məlumatlar açıqlanıb.

Bildirilib ki, son 48 saat ərzində İsrailin hücumları nəticəsində, 8-i dağıntılar altından çıxarılmaqla 12 fələstinlinin cəsədi xəstəxanalara çatdırılıb. Eyni zamanda 7 yaralının da tibbi müəssisələrə yerləşdirildiyi qeyd olunub.

Açıqlamada atəşkəsin qüvvəyə minməsindən sonra həyata keçirilən hücumlar nəticəsində 405 mülki şəxsin həlak olduğu, 1115 nəfərin yaralandığı, dağıntılar altından isə 649 nəfərin cəsədinin çıxarıldığı bildirilib.

Qeyd edilib ki, İsrailin 2023-cü ilin oktyabrından etibarən Qəzza zolağına başladığı hücumlar nəticəsində həyatını itirənlərin ümumi sayı 70 min 937, yaralananların sayı isə 171 min 192 nəfərə çatıb.