BAKI, AzerVoice, Nailə Babazadə

İsrail ordusu Qəzza Zolağının şimal və cənub bölgələrini havadan və artilleriya atəşləri ilə hədəf alıb, binaları partlatıb.

AzerVoice xəbər verir ki, yerli şahidlərdən əldə edilən məlumata görə, İsrail ordusuna məxsus döyüş təyyarələri cənubdakı Rifah və Xan Yunis şəhərlərinin şərq bölgələrini bombalayıb.

Bundan əlavə, şimaldakı Beyt Lahiya qəsəbəsi də hava hücumu ilə hədəfə alınıb.

Bu hücumlarla eyni vaxtda Xan Yunisin şimal və şərq bölgələri də artilleriya atəşləri ilə vuruldu, helikopterdən atəş açıldı.

İsrail əsgərləri Qəzza şəhərinin şərqindəki bəzi ev və obyektləri partlatdı.

İsrail ordusunun atəşləri nəticəsində şəhərin şərqindəki Şucaiyyə və Tuffah məhəllələri də zərər gördü, ətraf bölgələrdən partlayış səsləri eşidildi.

İsrail ordusu dünən Qəzza Zolağında atəşkəsi pozaraq, Xan Yunis şəhərində yerindən edilmiş fələstinlilərin çadırlarını hədəf alan hücumunda ikisi uşaq olmaqla 5 fələstinlini öldürmüşdü.

Qəzzada 10 oktyabrda qüvvəyə minən atəşkəs razılaşmasının döyüşləri dayandırması gözlənildiyi halda, İsrail razılaşmanı hər gün pozur. Hücumlar nəticəsində yüzlərlə fələstinli öldü və yaralandı.