BAKI, AzerVoice, Orxan Qədirzadə
Dünyanın tanınmış mədəniyyət və incəsənət nümayəndələri Fələstinli siyasi lider Mərvan Bərqutinin azad olunması üçün açıq məktub imzalayıblar. AzerVoice xəbər verir ki, bu barədə The Guardian məlumat yayıb.
66 yaşlı Bərquti artıq 23 ildir İsraildə həbsdədir. O, israillilər və fələstinlilər arasında sülhün mümkün olmasına inanan və birlik yaradan fiqur kimi qəbul edilir. Açıq məktubda onun həbs şəraitində zorakılığa məruz qalması və hüquqlarının pozulması ilə bağlı ciddi narahatlıq ifadə olunur.
“Biz Mərvan Bərqutinin davam edən həbsi, zorakı rəftara məruz qalması və hüquqi təminatlardan məhrum edilməsi ilə bağlı dərin narahatlıq keçiririk. BMT-ni və dünya hökumətlərini Barqutinin azad olunması üçün fəal addımlar atmağa çağırırıq.” - məktubda deyilib.
Məktubun imzalananları arasında yazıçılardan Marqaret Etvud, Filip Pullman, Zeydi Smit, Anni Erno, aktyorlardan Yan Makellen, Benedikt Kamberbeç, Tilda Svinton, Coş O’Konnor, Mark Ruffalo, Stiven Fray, musiqiçilərdən Stinq, Pol Saymon, Brayan Eno, Anni Lennoks və Qeri Lineker, Delia Smit, Riçard Brenson kimi məşhurlar var.
Uzun illərdir ekspertlər Bərqutinin həbsinə səbəb olan məhkəmə prosesinin ciddi qüsurlarla dolu olduğunu bildiriblər. İsrail hakimiyyəti onun azadlığa buraxılmasına dəfələrlə etiraz edib. Sorğulara görə, Bərquti bu gün də fələstinlilər arasında ən populyar siyasi liderdir və iki dövlətli həll variantını dəstəkləyir.
İsrail hökumətində fələstinli məhbuslara qarşı ölüm hökmü tətbiqini nəzərdə tutan yeni qanun layihələri müzakirə olunur. Ekspertlər bu sənədlərin Bərqutini də əhatə edə biləcəyini bildirirlər.
Barqutinin azad olunması uğrunda kampaniya 1980-1990-cı illərdə Nelson Mandelanın azadlığı üçün aparılan beynəlxalq hərəkatı xatırladır. Mandela özü 2002-ci ildə demişdi ki, “Bərqutiyə edilən, vaxtilə mənə edilənin eynisidir.”
Musiqiçi Brayan Eno vurğulayıb ki, mədəniyyətin gücü bəzən siyasətin istiqamətini dəyişə bilir. “Qlobal həmrəylik Mandelanı azad etdiyi kimi, Barqutinin də azad olmasını sürətləndirə bilər. Onun azadlığı bu uzun mübarizədə dönüş nöqtəsi olacaq.”- o, deyib.