Bakı, AzerVoice, Orxan Qədirzadə

ABŞ Ukraynada uzunmüddətli siyasi həllin əldə olunması üçün “bütün mümkün səyləri” göstərməyə və Rusiyanın əsas təkliflərini nəzərə almağa hazırdır.

AzerVoice xəbər verir ki, bu barədə Kremlin nümayəndəsi, Rusiya prezidentinin köməkçisi Yuri Uşakov Moskva və Vaşinqton nümayəndələrinin Kreml görüşündən sonra bildirib.

Rus mətbuatının məlumatına görə, Uşakov görüşün tam şəkildə Ukrayna ətrafındakı vəziyyətə həsr olunduğunu deyib. O bildirib ki, Rusiya tərəfi ABŞ nümayəndə heyətinə təqdim olunmuş sənədlər üzrə öz mövqeyini “açıq şəkildə” izah edib.

Uşakovun sözlərinə görə, müzakirələrdə Ukraynanın NATO-ya üzvlüyü ilə bağlı məsələlər də gündəmdə olub. Kremlin rəsmisi, həmçinin, son aylarda Rusiya Silahlı Qüvvələrinin əldə etdiyi uğurların danışıqların tonuna müsbət təsir etdiyini qeyd edib.

Uşakov bir daha vurğulayıb ki, Rusiya tərəfi təmaslara açıqdır, lakin Avropa ölkələri “praktiki olaraq birbaşa dialoqdan imtina ediblər.” Onun sözlərinə görə, ABŞ Prezidentinin xüsusi nümayəndəsi Stiv Uitkoffun iştirakı ilə baş tutan görüş “faydalı” olub və dialoqun davam etdirilməsi razılaşdırılıb.

Rusiya rəsmisi, həmçinin, ABŞ-la qarşılıqlı razılaşma əsasında danışıqların detalları açıqlanmadığını bildirib və hazırda Moskvanın Ukrayna mövzusunda “yalnız ABŞ-la danışdığını” xüsusi qeyd edib.

Donald Trampın xüsusi nümayəndəsi Stiv Uitkoff 2025-ci ildə Ukrayna ilə bağlı məsləhətləşmələr üçün Rusiyaya bir neçə dəfə səfər edib. Onun səfərləri fevralın 11-də və martın 13-də, həmçinin apreldə iki dəfə Sankt-Peterburqa və Moskvaya həyata keçirilib.

Onun Vladimir Putinlə əvvəlki görüşü 6 avqustda baş tutmuşdu. O zaman Kreml bildirmişdi ki, tərəflər arasında aparılan müzakirələr “səmərəli olub” və görüş gələcək Rusiya-ABŞ sammitinin Alyaskada keçirilməsi ilə bağlı ilkin siyasi siqnalların formalaşmasına imkan yaradıb.