BAKI, AzerVoice, Orxan Qədirzadə
Papa XIV Leo Livana səfərinin son günündə 2020-ci ildə Beyrut limanında baş vermiş və 218 nəfərin həyatına son qoymuş partlayışın yerləşdiyi əraziyə gələrək qurbanların ailələri ilə görüşüb. AzerVoice xəbər verir ki, hadisə ölkədə uzun illər davam edən idarəçilik böhranının və cəzasızlıq mühitinin rəmzi hesab olunur.
Papanı limanda qarşılayan ailələr yaxınlarının fotolarını nümayiş etdiriblər. Leo hər bir ailə üzvü ilə ayrı-ayrılıqda görüşərək onlara başsağlığı verib. Qeyd edək ki, partlayış limandakı son salamat qalan taxıl anbarının yanında yüzlərlə ton ammonium nitratın detonasiya etməsi nəticəsində baş vermiş və ölkəyə milyardlarla dollar ziyan vurmuşdu.
Hadisədən beş il keçsə də, istintaqın dəfələrlə bloklanması səbəbilə heç bir yüksək vəzifəli şəxs məsuliyyətə cəlb edilməyib. Bu isə illərdir korrupsiya və maliyyə pozuntuları ilə üzləşmiş Livanda ictimai narazılığı daha da gücləndirib. Papa Livana səfərinin ilk günündən siyasi rəhbərliyi “həqiqəti ortaya çıxarmağın sülh və barışığın əsas yolu” olduğunu qəbul etməyə çağırıb.
Günün ilk yarısında Papa psixoloji xəstəliklər üzrə ixtisaslaşmış De La Kruz xəstəxanasını da ziyarət edib. Burada onu İsveçrə qvardiyasına və kardinal geyimlərinə bənzər libaslarda olan uşaqlar qarşılayıb. Xəstəxana rəhbərliyi papanın səfərinin həssas qruplara diqqəti artıracağını bildirib.
Papa XIV Leo səfərini Beyrut sahilində keçirilən açıq hava ayini ilə başa vurub. Minlərlə sakin motor-kolon marşrutunda və ayin meydanında papanı alqışlarla qarşılayıb. Sabiq papa Fransiskin illərdir ölkəyə səfər etməyə çalışmasına baxmayaraq, Livandakı siyasi-iqtisadi böhran və onun səhhətindəki problemlər buna imkan vermirdi. Bu səbəbdən hazırkı səfər Livanda xüsusi simvolik əhəmiyyət qazanıb.
Partlayış qurbanlarının ailələri isə ədalət tələblərindən geri çəkilmir. Səfərdə iştirak edən sosial məsələlər naziri Hənin Səid və partlayışda oğlu həlak olan Mirayl Xuri də papanı qarşılayanlar arasında olublar. Xuri bildirib ki, istintaqın ləngiməsinə səbəb olan siyasi və təhlükəsizlik rəsmiləri məsuliyyət daşıyır.
Ailə üzvləri hər ay bir araya gələrək beynəlxalq ictimaiyyəti istintaqın irəliləməsinə dəstək verməyə çağırırlar. Xuri deyib: “Uşaqlarımız evlərində öldürüldü. Ammonium nitratın yaşayış məhəlləsinin yaxınlığında saxlanılmasına göz yumuldu. Ədalət təmin olunana qədər mübarizə davam edəcək.”