BAKI, AzerVoice, Orxan Qədirzadə
Türkiyənin iqtisadi proqramı çərçivəsində həyata keçirilən tədbirlər ölkənin makroiqtisadi göstəricilərində müsbət nəticələr verməyə davam edir.
AzerVoice xəbər verir ki, TürkStat (TÜİK) məlumatına görə, istehlak qiymətləri indeksi (TÜFE) aylıq 0,87%, istehsalçı qiymətləri indeksi (Yİ-ÜFE) isə 0,84% yüksəlib.
Bu göstərici 1 faizdən aşağı aylıq inflyasiya ilə son iki il yarımın ən aşağı səviyyəsi kimi tarixə düşüb. İllik inflyasiya 31,07% (TÜFE) və 27,23% (Yİ-ÜFE) olaraq ölçülüb - bu da son 4 ilin ən aşağı illik nəticəsidir.
Açıqlamaya görə, Türkiyə Mərkəzi Bankının (TCMB) sərt pul kredit xəttindən tədrici şəkildə çıxışı fonda sabitlik gətirib. Oktyabr ayında Mərkəzi Bankın ümumi valyuta ehtiyatları 198,4 milyard dollara yüksələrək tarixinin ən yüksək səviyyəsinə çatıb.
Türk lirəsi ilə sabit faizli depozit hesabları üzrə (KKM) portfelin azalması davam edir — 21 noyabr həftəsində 30,3 milyard lirə azalış qeydə alınıb. Bu dinamika xarici investorların lirə aktivlərinə marağını artırır və ölkənin borclanma xərclərini aşağı salır.
Türkiyənin beşillik kredit risk primi (CDS) 233 baza bəndinə enərək 2018-ci ildən bəri ən aşağı səviyyəni göstərib. Hazırda göstərici 231 bənd səviyyəsində sabitləşib.
Sentyabr ayında cari əməliyyatlar hesabı 1,112 milyard dollar, avqustda 5,4 milyard dollar, iyulda isə 1,7 milyard dollarlıq profisit göstərib. Bu ardıcıl üç aylıq nəticə iqtisadi sabitlik meyillərinin gücləndiyini təsdiqləyir.
“Anadolu Finance” analitiki Haluk Bürümçekçi bildirib ki, ərzaq qiymətlərinin azalması əsasən emal olunmamış məhsullar səbəbindən baş verib. Qeyri-ərzaq altqruplarında – mənzil, məişət avadanlıqları, səhiyyə, rabitə, təhsil və xidmət sektorlarında da qiymət artımı ötən illə müqayisədə daha aşağı olub.
Bürümçekçi ilin son ayında illik inflyasiyanın təxminən 31% səviyyəsində bağlanacağını proqnozlaşdırıb.
Ekspertlərə görə, inflyasiya göstəricilərindəki kəskin yavaşlama Mərkəzi Banka faiz endirimlərinə başlamaq üçün manevr imkanı verir.
Analitiklər faiz dərəcəsinin 37,5%-ə qədər endirilə biləcəyini ehtimal edirlər.