Bakı, AzerVoice, Orxan Qədirzadə

Suriya daxili işlər orqanları ölkənin şimalındakı Ələppo şəhərində fəaliyyət göstərən narkotik qaçaqmalçılığı şəbəkəsinə qarşı əməliyyat keçirərək 31 min kaptagon həbi və yüz minlərlə dollar dəyərində müxtəlif narkotik vasitələr müsadirə edib. AzerVoice xəbər verir ki, bu barədə Suriya Daxili İşlər Nazirliyi açıqlama yayıb.

Nazirliyin məlumatına görə, polis və narkotiklərlə mübarizə qrupları aparılan müşahidə əməliyyatından sonra “H.E.” adı ilə tanıdılan şəbəkə rəhbərini və onun dörd yaxın əməkdaşını saxlayıb. Əməliyyat zamanı on minlərlə kaptagon həbi, təxminən 500 qram kristal metamfetamin və bu narkotikin maye formaları ələ keçirilib.

Suriya Ərəb Xəbər Agentliyinin məlumatına əsasən, bu həftə Dəməşqdə aparılan başqa bir əməliyyat da narkotik dövriyyəsi ilə məşğul olan şəbəkənin zərərsizləşdirilməsi ilə nəticələnib. Həmin əməliyyatda şəbəkə başçısı və doqquz nəfər saxlanılıb.

Rəsmi məlumatlara görə, ölkə hüquq-mühafizə strukturları narkotik istehsalı, dövriyyəsi və qaçaqmalçılığına qarşı mübarizəni davam etdirir. Suriya bu istiqamətdə İordaniya, Türkiyə və İraqla birgə əməliyyatlar həyata keçirir və transsərhəd cinayətkar qrupların ləğvi üçün koordinasiyanı artırır.

Bəşər Əsədin keçmiş hakimiyyətinə qarşı beynəlxalq səviyyədə səsləndirilən ittihamlarda Suriya ərazisinin yüksək toksikliyə malik kaptagon istehsalı üçün regional mərkəzə çevrildiyi, həmçinin körfəz ölkələrinə və digər bölgələrə narkotik qaçaqmalçılığı həyata keçirən kartellərin dəstəkləndiyi bildirilir.