BAKI, AzerVoice, Orxan Qədirzadə
Papa XIV Leo Livana üç günlük səfərinin ilk çıxışında ölkənin siyasi, dini və ictimai rəhbərlərinə müraciət edərək sülhün “yalnız balans deyil, birlikdə yaşamağı bacarmaq” olduğunu bildirib.
AzerVoice xəbər verir ki, Beyrutda keçirilən tədbirdə 400-dən çox yüksək vəzifəli şəxsin qarşısında danışan pontifik Livanın müxtəlifliyinin, dözümlülüyünün və yenidən qurmaq iradəsinin Yaxın Şərq üçün nümunə təşkil etdiyini vurğulayıb.
Pontifik deyib ki, dünya üzrə çoxsaylı ölkələrdə insanlar artıq tarixi dəyişdirə biləcəklərinə inanmırlar və böyük qərarların “az sayda şəxsin əlində cəmləşdiyi” hissi güclənir. O, Livanın iqtisadi böhran, regional qeyri-sabitlik və kimlik çətinlikləri yaşadığını, lakin “ümidi yaşatmaq bacarığını” qoruduğunu bildirib.
Gənclərə ünvanlanan çağırışında Papa ölkəni tərk etməməyə, və xalqa xidmət ruhunu qorumağa səsləyib. Son illərdə genişmiqyaslı miqrasiya ilə üzləşmiş Livanda bu mesaj xüsusi önəm daşıyır.
Pontifik çıxışında icmalar arasında barışığın gücləndirilməsinin vacibliyini bildirib. Onun sözlərinə görə, “sülh bir dam altında ayrı-ayrı yaşamaq deyil, sülh bağlamış insanlar kimi birlikdə yaşamaqdır”.
Papa həmçinin qadınların sülh quruculuğunda əsas rol daşıdığını və onların sosial, siyasi və dini həyatda daha geniş təmsilçiliyinin Livanın yenilənməsi üçün zəruri olduğunu qeyd edib.
Beyrutdakı tədbirdə çıxış edən Prezident Cozef Aun Livanın “kiçik ölçüsünə baxmayaraq böyük missiya daşıdığını” və çoxkonfessiyalı modelin dünya üçün unikal nümunə olduğunu bildirib. Aun vurğulayıb ki, “xristianların yoxluğu ölkənin balansını, müsəlmanların yoxluğu isə moderasiyanı məhv edər”.
Səfər rəsmi mərasimlə qarşılanıb. Papa XIV Leo-nun təyyarəsi Beyrutdakı Rafiq Hariri Hava Limanına daxil olduğu an iki hərbi qırıcı tərəfindən müşayiət olunub, 21 top atəşi açılıb, ölkə kilsələrinin zəngləri çalınıb. Minlərlə insan, o cümlədən uşaqlar pontifikə çiçəklər, duz və Livan torpağı təqdim ediblər.
Səfərin marşrutu boyunca, o cümlədən Güney Beyrut və Baabda istiqamətində yüzlərlə sakin yağışlı havaya baxmayaraq yollara çıxaraq pontifiki alqışlarla müşayiət ediblər. Prezident Sarayında keçirilən görüşlərdə bütün dini icmaların liderləri, diplomatlar, vətəndaş cəmiyyəti təmsilçiləri və Hizbullah nümayəndələri iştirak ediblər.