BAKI, AzerVoice
İsrailin Baş naziri Benyamin Netanyahu illərdir davam edən korrupsiya məhkəməsi çərçivəsində bazar günü dövlət başçısına rəsmi əfv müraciəti təqdim edib. O hesab edir ki, barəsində aparılan cinayət işi İsrailin işlərini idarə etmək imkanına mane olur və əfvin verilməsi dövlətin ümumi maraqlarına xidmət edir.
Dövlətin yaradılmasından bəri ən uzun müddət baş nazir postunda qalan Netanyahu rüşvət, dələduzluq və etimadı sui-istifadə ittihamlarını uzun müddətdir rədd edir.
Onun vəkilləri prezidentin ofisinə göndərdikləri məktubda bildiriblər ki, Netanyahu hələ də hüquqi prosesin onu tam bəraətləndirəcəyi qənaətindədir.
Netanyahu, mənsub olduğu “Likud” Partiyasının yaydığı qısa videomüraciətdə deyib.
“Bu gün vəkillər əfv üçün müraciəti dövlət başçısına göndərdilər. Mən ölkənin mənafeyini düşünən hər kəsdən bu addımı dəstəkləməsini gözləyirəm” - deyə o bildirib.
Prezident İsxak Hersoqun ofisi günün əvvəlində müraciəti aldığını təsdiqləyib və vəkillərin məktubunu dərc edib.
Hersoqun ofisindən bildirilib ki, müraciət adi prosedura uyğun olaraq Ədliyyə Nazirliyinə göndəriləcək, nazirlik müvafiq rəyləri toplayacaq və bundan sonra prezidentin hüquqi müşavirinə təqdim ediləcək. Müşavir prezidentə yekun tövsiyəsini verməli olacaq.
Ədliyyə naziri Yariv Levin də Netanyahunun rəhbərlik etdiyi “Likud” Partiyasının üzvü və baş nazirə yaxın müttəfiq sayılır.
Vəkillər məktublarında qeyd ediblər ki, Netanyahuya qarşı aparılan cinayət işi cəmiyyətdəki parçalanmanı daha da dərinləşdirib və məhkəmə prosesinin dayandırılması milli barışığın əldə olunması üçün zəruridir. Onlar həmçinin vurğulayıblar ki, məhkəmənin davamlı iclasları baş nazir üçün ağır yükə çevrilib və onun vəzifə səlahiyyətlərini icra etməsini çətinləşdirir.
“Məndən həftədə üç dəfə məhkəmədə ifadə verməyim tələb olunur... Bu, qeyri-mümkün bir tələbdir və heç bir digər vətəndaşdan bu cür tələb olunmur”- Netanyahu videomüraciətində deyib.
O, dəfələrlə seçkilərdə qalib gələrək xalqın etimadını qazandığını xüsusi vurğulayıb.
Baş nazir və ya onun vəkilləri heç bir səhv etdiyini etiraf etməyiblər. İsraildə adətən əfv yalnız məhkəmə prosesi başa çatdıqdan və təqsir təsbit edildikdən sonra verilir.
Müdafiə tərəfi hesab edir ki, dövlət başçısının səlahiyyətləri ictimai maraqların təhlükə altında olduğu hallarda – bu işdə olduğu kimi – prosessə müdaxilə etməyə imkan verir. Onların fikrincə, burada məqsəd cəmiyyətdə yaranmış yarığın sağaldılması və milli birliyin möhkəmləndirilməsidir.
Müxalifət lideri Yair Lapid yaydığı bəyanatda bildirib ki, Netanyahunun əfv alması yalnız üç şərtlə mümkün ola bilər: günahın etirafı, peşmanlığın ifadə edilməsi və dərhal siyasətdən getmək.
Bu ay ABŞ Prezidenti Donald Tramp da Hersoq ünvanına göndərdiyi məktubda Netanyahunun əfv olunmasını xahiş etmişdi.