BAKI, AzerVoice, Nailə Babazadə

İsrail ordusu, 29 noyabrda çəkildiyi Qərb Şəriyənin şimalındakı Tubas şəhəri və şəhər yaxınlığındakı Akaba qəsəbəsinə yenidən hərbi əməliyyat həyata keçirib.

AzerVoice xəbər verir ki, şahidlərin verdiyi məlumata görə, Tubas və Akaba bölgələrinə çox sayda hərbi birləşmə ilə daxil olan İsrail ordusu, şəhərin və qəsəbənin küçələrinə yerləşib.

Tubas və Akaba bölgələrində ikinci bir elan verilənədək küçəyə çıxma qadağası tətbiq olunub. Hərbi buldozerlər isə Tubasda yolları bağlamağa başlayıb.

Fələstinlilərin evlərinə reydlər keçirən İsrail əsgərləri bəzi evləri hərbi qərargaha çevirib.

Tubas valiliyindən verilən açıqlamada bildirilib ki, İsrail ordusunun əvvəlki reydləri nəticəsində yüzlərlə Fələstinli yaralanıb, həbs edilib və həm dövlət, həm də özəl mülklərə ciddi ziyan dəyib.

Tubas Təhsil İdarəsi isə İsrail ordusunun yerli vaxtla saat 04:00-dan etibarən bölgədə küçəyə çıxma qadağası tətbiq etməsi səbəbindən şəhərdə bütün üzbəüz təhsilin dayandırıldığını və onlayn təhsilə keçildiyini açıqlayıb. Üzbəüz təhsilin bərpası barədə qərarın bölgədəki vəziyyətə görə veriləcəyi bildirilib.

İsrail ordusu 26 noyabrda Tubas şəhərinə genişmiqyaslı hücum başladığını elan etmiş, şəhərə “Bölgəniz terror yuvasına çevrilib. İsrail ordusu buna laqeyd qala bilməz, davam edərsə nəticələriniz Cenin və Tulkerim kimi olacaq” yazılı xəbərdarlıq elanları atmışdı.

Fələstin Məhbuslar Cəmiyyəti məlumat verir ki, İsrail ordusu Tubasda evləri reyd edib, sakinləri köçürüb və bəzi evləri hərbi qərargaha çevirib, 162 Fələstinliyi həbs edib. Əməliyyatlarda 150 nəfər yaralanıb. 29 noyabrda, əməliyyatın 4-cü günündə İsrail qüvvələri Tubasdan çəkilmişdi.

Qeyd edək ki, 7 oktyabr 2023-cü ildən İsrailin Qəzza zolağına başladığı hücumdan sonra işğal altındakı Qərb Şəriyə və Şərqi Qüdsdə Fələstinlilərə qarşı həbs, reyd və hücum hallarında artım müşahidə olunur.