BAKI, AzerVoice, Nailə Babazadə

İsrail ordusunun Qəzza zolağında həyata keçirdiyi hücumlarda son 24 saat ərzində 10 fələstinli həyatını itirib. 7 oktyabr 2023-cü ildə başlayan hücumlar nəticəsində ölənlərin ümumi sayı 69 min 785 nəfərə, yaralıların sayı isə 170 min 965 nəfərə yüksəlib.

AzerVoice xəbər verir ki, Qəzza Səhiyyə Nazirliyinin yaydığı yazılı açıqlamada bildirilib ki, son sutkada İsrailin hücumları nəticəsində 8-i dağıntılar altından çıxarılan olmaqla ümumilikdə 10 nəfərin cəsədi xəstəxanalara çatdırılıb.

Açıqlamada həmçinin, atəşkəsin qüvvəyə minməsindən bu yana davam edən hücumlarda 347 nəfərin öldüyü, 889 nəfərin yaralandığı, dağıntılar altından isə 596 nəfərin cəsədinin çıxarıldığı qeyd olunub.

Qəzzaya qarşı hücumların başlanğıcı olan 2023-cü ilin oktyabrından bu günə qədər ölənlərin və yaralananların sayı artmaqda davam edir.

Qeyd edək ki, ABŞ Prezidenti Donald Tramp 9 oktyabrda Misirdə davam edən danışıqlarda İsrail və HƏMAS-ın atəşkəs planının ilk mərhələsini qəbul etdiyini açıqlamışdı. Misirdə əldə edilən razılaşma İsrail hökumətinin təsdiqindən sonra 10 oktyabr tarixində qüvvəyə minib.

Buna baxmayaraq, İsrail ordusu Qəzza zolağında əldə edilmiş atəşkəsə rəğmən müxtəlif iddialar irəli sürərək aralıq hücumlar həyata keçirməkdə davam edir.