BAKI, AzerVoice, Nailə Babazadə

Suriya Müdafiə Nazirliyi bildirib ki, vətəndaş müharibəsi zamanı Bəşşar Əsəd rejiminin dinc sakinlərə qarşı zorakılıqlarına etiraz edərək ordudan ayrılan zabitlər və hərbçilər istəsələr, vəzifələrinə bərpa olunacaqlar.

AzerVoice xəbər verir ki, nazirlik yaxın günlərdə fərarilik edən gizirlər və digər hərbi qulluqçuların müraciətlərini qəbul etməyə başlayacaq.

Müdafiə Nazirliyinin İnformasiya və Kommunikasiya Departamentinin direktoru Assem Qalioun onların “yeni ordunun ayrılmaz hissəsi” olduğunu bildirib. Onun sözlərinə görə, həmin zabitlər “xain orduya qarşı çıxaraq Suriya inqilabında iştirak ediblər”.

Əsəd rejiminin ordusunu tərk edən hərbçilərin dəqiq sayı rəsmi olaraq açıqlanmayıb. Karnegi İnstitutunun 2014-cü il araşdırmasına görə, müharibənin ilk illərində bu rəqəmin 20 mindən 100 minə qədər olduğu ehtimal edilirdi. Suriya müharibəsi 2011-ci ildə başlayıb və keçən ilin dekabrında Əsədin devrilməsi ilə başa çatıb.

Bu həftə Suriya xarici işlər naziri Əsəd əş-Şeybani keçmiş rejimdən ayrılan 21 diplomatı da vəzifəsinə qaytarıb. O, həmin diplomatların “rejimin cinayətlərini ifşa etməkdə və Suriya xalqının mübarizəsini dəstəkləməkdə göstərdiyi fədakarlığı” yüksək qiymətləndirib.