BAKI, AzerVoice, Nailə Babazadə

İsrailin hücumları nəticəsində Qəzza zolağında evlərini tərk edən 75 minə yaxın fələstinlinin, əksəriyyəti zərər görmüş BMT-nin Yaxın Şərqdəki Fələstinli Qaçqınlara Yardım və Bərpa Agentliyinə (UNRWA) məxsus 100-dən çox binada yaşadığı bildirilib.

AzerVoice xəbər verir ki, UNRWA-nın ABŞ mərkəzli X sosial media platformasındakı hesabında yayımlanan açıqlamada, İsrailin iki il ərzində Qəzza zolağında həyata keçirdiyi hücumlar nəticəsində yerindən edilmiş fələstinlilərin vəziyyətinə diqqət çəkilib.

Qurumun məlumatına görə, bölgədə 75 min fələstinli UNRWA-ya məxsus binalarda məskunlaşıb, lakin bu binaların çoxu da İsrailin hücumları zamanı zərər görüb.

UNRWA-nın bəyanatında bu binalardakı sıxlığın “həddindən artıq” olduğu vurğulanıb və qeyd edilib ki, təşkilatın əməkdaşları ağır şəraitə baxmayaraq, fələstinlilərə təhlükəsiz yaşayış mühiti təmin etməyə çalışırlar.

Qəzzadakı hökumətin rəsmi məlumatına əsasən, İsrailin 2023-cü ilin oktyabrından bəri iki il davam edən hücumları nəticəsində 2,4 milyon əhalisi olan Qəzzada 2 milyondan çox fələstinli evlərini tərk etmək məcburiyyətində qalıb.

Xatırladaq ki, ABŞ Prezidenti Donald Trump 9 oktyabrda Misirdə aparılan danışıqlar zamanı İsrail və HƏMAS-ın Qəzzada atəşkəs planının ilk mərhələsini təsdiqlədiyini açıqlamışdı. Müqavilə Misirdə imzalandıqdan sonra, 10 oktyabrda İsrail hökumətinin təsdiqi ilə qüvvəyə minib.