BAKI,AzerVoice

Fələstin Milli Azadlıq Hərəkatı (FƏTH) hərəkatının sözçüsü Əbdülfəttah Davlə “əş-Şərq əl-Əvsət”ə bildirib ki, “hərəkat Qəzza sektorundan olan peşəkar şəxslərdən ibarət olacaq “Qəzza İdarə Komitəsi” üçün təklif olunan heç bir adı blok etməyəcək”.

2025-ci il 24 oktyabr tarixində, “Fəth” istisna olmaqla, Qahirədə keçirilən görüşdə fələstinli fraksiyalar “atəşkəs razılaşmasının həyata keçirilməsinin dəstəklənməsi və davam etdirilməsi, Qəzza sektorunun idarə olunmasının sektorun sakinlərindən ibarət olan və müstəqillərdən formalaşan müvəqqəti Fələstin komitəsinə təhvil verilməsi və sektorun yenidən qurulmasının maliyyələşdirilməsi və icrasına nəzarət edəcək beynəlxalq komissiyanın yaradılması, həmçinin Fələstin siyasi sisteminin vahidliyinin və milli müstəqil qərar prinsipinin qorunması” barədə razılığa gəliblər. Fraksiyalar “bütün qüvvələrin və fələstinli fraksiyaların təcili milli strategiya üzərində anlaşmaq üçün təcili toplantı keçirməsinə” çağırış ediblər.

Görüşdən sonra komitəyə rəhbərliklə bağlı fikir ayrılıqları yarandı, xüsusən İsrail media orqanları bir neçə gün əvvəl fələstinli fraksiyaların Qəzzanın idarə komitəsinin rəhbəri kimi Əmcəd əş-Şəvanın adını müzakirə etdiklərini yaydıqdan sonra.

“Qəzza sektorunun idarə komitəsinin legitim çərçivəsi bir il əvvəl fraksiyalarla, o cümlədən HƏMAS-la razılaşdırılmışdı və HƏMAS görüşdən öncə bu razılaşmanı bir daha təsdiqləyib. Razılaşmaya əsasən, bu komitə Fələstin hökumətinin qanuni çərçivəsində fəaliyyət göstərməli, hökumət üzvlərindən biri olan bir nazirin rəhbərliyi altında olmalı və Fələstin dövlətinin idarəetmə və institusional sisteminin birliyi təmin edilməlidir.”-deyə Davlə bildirib.

O əlavə edib ki, “Qahirədə iştirak edən fraksiyalar tərəfindən yayımlanan son bəyanat əldə olunmuş razılaşmadan fərqləndiyi üçün təcrübədə izahata və düzəlişə ehtiyac yaranır. Bu da son görüşlərin əsaslandığı anlayış ruhunun qorunması üçün vacibdir.”

“HƏMAS lideri Tahir ən-Nunun açıqlamasına gəlincə, biz ümid edirik ki, bu, Fələstin hökumətinin qanuni çərçivəsində bir nazirin rəhbərliyində mütəxəssislərdən ibarət komitənin formalaşdırılmasını dəstəkləyən HƏMAS-ın rəsmi mövqeyinin təsdiqi olacaq, sadəcə mediada səslənmiş və tezliklə başqa bəyanatla inkar edilə biləcək açıqlama deyil.”-deyə Davlə qeyd edib.

“Fəth” sözçüsü hesab edir ki, “Nununun bu mövqeyinin HƏMAS tərəfindən rəsmi və yekdil şəkildə təsdiqi fələstinlilər arasında milli birliyi möhkəmləndirəcək, yenidənqurma, ilkin bərpa və Qəzza sektorunun vahid milli strategiya çərçivəsində idarə olunması prosesini irəli aparacaq. Bu həm də xalqımızın maraqlarını, vətənin vahidliyini və Fələstin Azadlıq Təşkilatı və Fələstin Dövləti ilə təmsil olunan milli legitimliyi qoruyacaq”.

“Biz “Fəth” olaraq adlarla mübahisə etmirik. Bizim üçün əsas anlayışın özü və komitənin siyasi və inzibati legitimliyinin təmin edilməsidir. Komitənin Qəzza sektorundan olan peşəkar və məsuliyyətli şəxslərdən ibarət olmasına hörmətlə yanaşırıq və heç bir namizədə mane olmayacağıq. Qəzza sektorunda fraksiyalara bağlı olmayan, yüksək peşəkarlığa sahib çoxlu sayda insanlar var və milli konsensusla işləyə bilərlər”.-deyə Fələstin rəsmisi bildirib.

O, ad çəkməkdən imtina etsə də, hərəkatdakı məsul bir mənbə “əş-Şərq əl-Əvsət”ə bildirib ki, “Qəzzanın idarə komitəsinə rəhbərlik üçün hələ də əsas namizədlərdən biri Fələstin səhiyyə naziri, Qəzza sakini doktor Macid Əbu Ramazandır. O həm hökumət naziri, həm də sahədə geniş təcrübəyə malik milli fiqur kimi bu məsuliyyəti daşımağa qadirdir.”

Digər tərəfdən, HƏMAS mətbuat müşaviri Tahir ən-Nunu çərşənbə günü Dohadan verdiyi TV müsahibəsində bildirib ki, hərəkat komitəyə daxil olmaq üçün 45 müstəqil texnokratın adını təklif edib. O əlavə edib ki, təklif olunan şəxslərin heç bir siyasi bağlantısı yoxdur və 24 oktyabr Qahirə görüşündə bütün fraksiyalar tərəfindən qəbul edilib.

Nunu əlavə edib ki, HƏMAS “Fəth”in təklifi ilə razılaşıb ki, komitəyə rəhbərlik edəcək şəxs Fələstin hökumətinin naziri olsun. Onun sözlərinə görə, adlar Misir rəhbərliyi ilə müzakirə olunub və komitənin üzvlərini seçəcək tərəf Qahirə olacaq. Komitə Qəzza sektorunun tam idarəçiliyinə -Q o cümlədən təhlükəsizlik idarəçiliyinə – heç bir fraksiyanın müdaxiləsi olmadan dərhal başlayacaq.