BAKI, AzerVoice, Nailə Babazadə
Ev Yıxımlarına Qarşı İsrail Komitəsinin (ICAHD) rəhbəri, İsrailli antropoloq Jeff Halper bildirib ki, İsrail 2023-cü ilin oktyabrından bəri Qəzza Zolağına etdiyi hücumlarda yüz minlərlə evi, ibadətgahı, məktəbi və mülki infrastrukturu dağıdıb və yenidənqurma layihələrinə Fələstinliləri daxil etmir.
AzerVoice xəbər verir ki, Halper bu açıqlamaları, İsrailin Qəzza ərazisində törətdiyi müharibə cinayətlərini araşdırmaq üçün yaradılmış qlobal və müstəqil təşəbbüs olan Qəzza Məhkəməsinin İstanbulda keçirilən son iclası çərçivəsində Anadolu Agentliyinə deyib.
Halper bildirib ki, İsrail 1948-ci ildə Fələstinliləri zorla köçürtməklə (“Nəkbə”) başlayaraq Fələstinlilərə aid evlər, məscidlər, kilsələr, məktəblər daxil olmaqla təxminən yarım milyon tikilini dağıdıb. 2023-cü ilin oktyabrından etibarən isə yalnız Qəzzada təxminən 300 min ev dağıdılıb.
O, bu dağıdılmanın Fələstinliləri zorla torpaqlarından çıxarıb “tək bir sionist İsrail” dövləti yaratmaq üçün aparılan etnik təmizliyin bir hissəsi olduğunu vurğulayıb.
“İsrailin məqsədi Qəzzanı yaşanılmaz hala gətirməkdir”. - deyə o qeyd edib.
Halper əlavə edib ki, İsrail Qəzzanın yenidən qurulması planlarına Fələstinliləri daxil etmir və bölgəni turistlər və qanunsuz məskunlaşanlar üçün açmağı hədəfləyir. Xarici investorların bu layihələrə yatırımları da Fələstin xalqının əleyhinədir.
“Qəzzanın yenidən qurulmasından danışarkən əmin olmalıyıq ki, bu, Qəzzada yaşayan xalq üçün həqiqətən faydalı bir yenidənqurmadır.” - deyə o vurğulayıb.
Halper həmçinin vurğulayıb ki, İsrailin hücumları nəticəsində Fələstinlilərin evləri ilə yanaşı, Qəzzadaki mülki infrastruktur və kənd təsərrüfatı sahələri də dağıdılıb və yenidənqurma təxminən 80 milyard dollar dəyərində ola bilər.
“Tramp və keçmiş İngiltərə Baş naziri Toni Bler tərəfindən Qəzzanı idarə etmək üçün yaradılan Barış Şurası layihəsinin ən böyük təhlükəsi ondadır ki, Qəzzalılar heç bir söz sahibi deyil.” - deyə Halper qeyd edib.
O əlavə edib ki, Qəzzalıların öz idarəçiliyi barədə heç kimdən soruşulmur və Fələstin İdarəsi bütün bu prosesə daxil edilməyib. “Qəzza necə idarə olunacaq, kim qalacaq, yenidənqurma necə olacaq? Bunların heç biri Qəzzalılar və ya Fələstin xalqı ilə bağlı deyil. Əsas təhlükə onların öz idarəçiliyini və bölgədə qalmaq imkanlarını əlindən alıb müstəmləkəçilərə verməkdir.”
Halper həmçinin xəbərdarlıq edib ki, Qəzzada bütün dini məkanlar dağıdılıb.
O, Abraham Sazişləri çərçivəsində “İsraillə münasibətləri və məskunlaşmanı normallaşdırma ideyası”nın Fələstin əleyhinə plan olduğunu qeyd edib.
“İsrail ironik şəkildə ərəb ölkələrinin yardımı ilə qazana bilər. Məncə bəzi ərəb ölkələrinin rəhbərləri regionun xeyrindən əvvəl öz maraqlarını düşünür və əsas təhlükə də budur.” - deyə o qeyd edib.