BAKI, AzerVoice, Nailə Babazadə

Qəzzadaki hökumət, HƏMAS ilə İsrail arasında 10 oktyabrda əldə edilən atəşkəsdən bəri Qəzza zolağına humanitar yardım daşıyan cəmi 986 yük maşınının daxil olduğunu bildirib.

AzerVoice xəbər verir ki, Qəzza hökumətinin media ofisindən yayılan yazılı açıqlamada, İsrailin iki il boyunca blokada altında saxlayıb bombaladığı Qəzza zolağına atəşkəs və əsir mübadiləsi razılaşmasından sonra çatdırılan humanitar yardımla bağlı məlumat verilib.

Açıqlamada qeyd olunub ki, atəşkəs qüvvəyə mindikdən sonra 14-ü məişət qazı balonu və 28-i yanacaq daşıyan olmaqla, ümumilikdə 986 yardım yük maşını Qəzza zolağına çata bilib.

“Atəşkəsdən sonra, 20 oktyabr 2025 tarixinədək Qəzzaya 6 min 600 humanitar yardım maşını daxil olmalı idi, lakin faktiki olaraq bu say 986 maşınla məhdud qalıb.” - deyə açıqlamada bildirilib.

HƏMAS ilə İsrail arasında əldə edilən atəşkəs və əsir mübadiləsi razılaşmasından bəri Qəzza zolağına gündəlik orta hesabla 89 yardım yük maşınının daxil olduğu vurğulanıb, halbuki atəşkəs razılaşmasına əsasən bu say gündə 600 maşın olmalı idi.

Açıqlamada İsrailin Qəzza zolağında yaşayan 2,4 milyon fələstinliyə qarşı aclıq siyasətini davam etdirməyə çalışdığı bildirilib və Qəzzanın gündəlik 600 yük maşını (ərzaq, dərman və yanacaq yüklü) humanitar yardıma ehtiyacı olduğu qeyd olunub.

Qeyd edək ki, ABŞ Prezidenti Donald Tramp, 9 oktyabrda Misirdə davam edən danışıqlarda İsrail və HƏMAS-ın Qəzzada atəşkəs planının ilk mərhələsini təsdiqlədiyini açıqlamışdı.

Misirdə aparılan danışıqlarda imzalanan razılaşma, İsrail hökumətinin təsdiqindən sonra 10 oktyabrda qüvvəyə minmişdi.

Bununla belə, İsrail ordusu Qəzza zolağında əldə edilən atəşkəsə baxmayaraq, müxtəlif bəhanələrlə fələstinlilərə qarşı hücumlarını davam etdirir.

Razılaşmaya əsasən, İsrailin Qəzzəyə hər gün 600 humanitar yardım yük maşınının girişinə icazə verməsi nəzərdə tutulub.

Lakin fələstinli mənbələr bildirir ki, Qəzzaya daxil olan yardım maşınlarının sayı bu göstəricidən xeyli azdır.