BAKI, AzerVoice, Nailə Babazadə

HƏMAS-ın Qəzzada saxladığı 4 israilli əsirin cənazəsini gecə saatlarında təhvil verməsinin ardından İsrailin, Qəzzanın dünyaya açılan qapısı hesab edilən Qəzza-Misir arasındakı Rəfah Sərhəd Keçidini bu gün atəşkəs razılaşmasına uyğun olaraq açacağı bildirilib.

AzerVoice xəbər verir ki, İsrail dövlət televiziyası KAN-ın xəbərinə görə, İsrail hökuməti HƏMAS-a qarşı bu gün tətbiq ediləcəyini elan etdiyi sanksiyalardan imtina etmək qərarına gəlib.

İsrailin siyasi rəhbərliyi Qəzzanı Misirə birləşdirən Rəfah Sərhəd Keçidinin planlaşdırıldığı kimi bu gün açılmasına və humanitar yardım axınının razılaşmaya uyğun davam etməsinə qərar verib.

HƏMAS-ın gecə saatlarında Qəzza zolağında saxladığı israilli ölü əsirlərdən daha 4-nün cənazəsini təhvil verməsi və bu gün də bənzər şəkildə bir neçə cənazəni təhvil verəcəyini bildirməsi İsrailin bu qərarında təsirli olub.

Qeyd edək ki, HƏMAS-la əldə edilən atəşkəs razılaşmasına baxmayaraq, İsrail daha əvvəl Qəzza zolağından Misirə keçidi təmin edən Rəfah Sərhəd Keçidini çərşənbə günü açmayacağını açıqlamışdı.

İsrail bu qərarına səbəb olaraq HƏMAS-ın əlində olan bütün ölü israilli əsirlərin cənazələrinin təhvilindəki gecikməni göstərmişdi.

HƏMAS, əsir mübadiləsi çərçivəsində gecə saatlarında Qəzza zolağında saxladığı daha 4 israilli əsirin cənazəsini Beynəlxalq Qızıl Xaç Komitəsinə təhvil vermişdi. Beləliklə, atəşkəs və əsir mübadiləsi razılaşması çərçivəsində Həmas Qəzzadakı 28 ölü əsirdən 8-nin cənazəsini təhvil vermiş olub.

İsrailin Qəzzada 2 il boyunca həyata keçirdiyi, soyqırım səviyyəsinə çatan hücumlar və İsrail ordusunun Qəzzanın bəzi hissələrində davam edən işğalı səbəbilə Həmasın bütün cənazələrin yerini müəyyən etməsinin çətin olduğu atəşkəs razılaşmasında tərəflər tərəfindən qəbul edilib.

Bu səbəblə, Qəzzadakı israilli ölü əsirlərin cənazələrinin müəyyən edilməsi və tapılması üçün Türkiyə, Qətər, Misir və ABŞ nümayəndələrinin iştirak etdiyi bir komitənin yaradılması qərara alınıb.