BAKI, AzerVoice, Nailə Babazadə

İsrail ordusunun Qəzza zolağından qismən geri çəkilməsi və atəşkəsin qüvvəyə minməsindən sonra yüz minlərlə fələstinli Qəzzənin mərkəzi və cənub bölgələrindən şimal istiqamətinə qayıtmağa davam edir.

AzerVoice xəbər verir ki, İsrailin hücumları zamanı evlərini tərk etmək məcburiyyətində qalan minlərlə fələstinli, sığındıqları mərkəzləri tərk edərək, Qəzza şəhəri və şimal bölgələrdə yerləşən evlərinə doğru yola çıxıblar.

Fələstinlilər, Qəzzənin cənubundan şimalına keçmək üçün Reşid və Salahəddin yolları üzərindən saatlarla davam edən çətin bir yolçuluğa çıxırlar. Yanacaq çatışmazlığı səbəbindən çox az sayda nəqliyyat vasitəsinin işlədiyi bölgədə insanlar əsasən piyada hərəkət edir. Bəziləri isə at, eşşək arabaları, velosiped və motosikletlərdən istifadə edir.

Lakin geri dönənlərin çoxunu daha bir faciə gözləyir – yüzlərlə insan İsrail hücumları nəticəsində tamamilə dağıdılmış evlərinin yerində çadır qurmaq məcburiyyətində qalır.

Qeyd edək ki, Qəzza zolağında atəşkəs rejimi Misirdə əldə olunan razılaşma çərçivəsində yerli vaxtla dünən saat 12:00-da qüvvəyə minib. İsrail ordusunun açıqlamasına görə, "sarı xətt" kimi tanımlanan mövqelərə doğru qismən geri çəkilmə tamamlanıb.