BAKI, AzerVoice, Nailə Babazadə

İsrail ordusu atəşkəsin qüvvəyə minməsinə baxmayaraq, Qəzza zolağının müxtəlif bölgələrinə hücumlarını davam etdirir.

AzerVoice xəbər verir ki, hadisə şahidlərindən əldə edilən məlumata görə, İsrail ordusuna məxsus qırıcı təyyarələr və artilleriya birlikləri bu gecə atəşkəs razılaşması təsdiqləndikdən sonra səhər saatlarında Qəzza zolağının şimalında yerləşən Qəzza şəhərinin şərq hissəsini hədəfə alıblar.

Şahidlər, həmçinin İsrail ordusuna məxsus tanklardan Qəzzanın şimalı ilə cənubunu bir-birindən ayıran Netzarim Dəhlizi ətrafına atəş açıldığını bildiriblər.

Bundan əlavə, Qəzza zolağının cənubundakı Rəfah şəhərinin şimal-qərbində yerləşən Şakuş bölgəsi yaxınlığında mövqe tutmuş İsrail hərbi maşınlarının, məcburi köçkünlərin sığındığı ev və çadırlara atəş açdığı qeyd edilib.

İsrail artilleriya birlikləri həmçinin cənubdakı Xan Yunis şəhərinin şimal-şərqinə duman bombaları atıb və şəhər mərkəzinə hava hücumu təşkil edib.

Qəzzadakı Səhiyyə Nazirliyi son hücumlarla bağlı hələlik ölən və ya yaralananlarla bağlı açıqlama yaymayıb.

İsrail hökuməti ABŞ Prezidenti Donald Trampın planı çərçivəsində Qəzzadakı atəşkəs razılaşmasını təsdiqləmişdi.

İsrailin dövlət televiziyası KAN-ın xəbərinə görə, hökumət üzvlərinin əksəriyyəti razılaşmanı təsdiqləsə də, Milli Təhlükəsizlik Naziri İtamar Ben-Qvir və Maliyyə Naziri Bezalel Smotriç daxil olmaqla 5 radikal sağçı nazir "əleyhinə" səs verib.