BAKI, AzerVoice, Nailə Babazadə

Fələstin İqtisadiyyat Nazirliyi, İsrailin işğal altındakı İordan çayının qərb sahilində yerləşən və "dünyaya açılan yeganə qapı" kimi tanınan Kral Hüseyn (Allenby) körpüsünü bağlama qərarına kəskin reaksiya verib. Nazirlik bildirib ki, sərhədin bağlanması iqtisadi, sosial və humanitar fəlakətə yol aça bilər.

AzerVoice xəbər verir ki, yazılı açıqlamada qeyd olunub ki, Kerame adlandırılan bu sərhəd keçidi Fələstin xalqının ixrac və idxal əməliyyatları üçün həyati əhəmiyyət daşıyır. Fələstin istehsalçılarının dünya bazarına çıxışı, ərzaq təhlükəsizliyi və humanitar yardımların çatdırılması bu keçid məntəqəsindən asılıdır.

Açıqlamada bu addımın Fələstin xalqına qarşı siyasi təzyiq və cəzalandırıcı siyasətin bir hissəsi olduğu qeyd edilib. İsrailin Fələstin hökumətinə məxsus vergi gəlirlərini saxlaması və hərbi nəzarət vasitəsilə bölgədə hərəkət azadlığını məhdudlaşdırması da vurğulanıb.

Fələstin tərəfi bildirir ki, sərhədin bağlanması təkcə iqtisadi deyil, həm də ciddi humanitar böhran yarada bilər, xüsusilə Qəzza zolağına yardım axınının kəsilməsi baxımından təhlükəlidir.

Fələstin hökuməti beynəlxalq ictimaiyyəti bu məsələ ilə bağlı dərhal tədbir görməyə və İsrailə təzyiq göstərməyə çağırır.

Qeyd edək ki, İsrail Baş naziri Binyamin Netanyahu, 24 sentyabr tarixindən etibarən Allenby körpüsünün ikinci bir əmrlə qədər bağlanması barədə göstəriş verib. İsrail mediası bu qərarı, Fələstin dövlətini tanıyan ölkələrə cavab addımı kimi şərh edib.