BAKI, AzerVoice, Fərid Mikayılov
İsrail ordusu Qəzzanın cənubundakı Tel əl-Heva məhəlləsində yerləşən Fələstin Tibbi Yardım Assosiasiyasının (PMRS) baş ofisini hədəf alıb.
AzerVoice xəbər verir ki, qurumun yaydığı açıqlamada bildirilib ki, hücum nəticəsində mərkəz tamamilə xidmət xaricinə çıxıb.
Qurum xatırladıb ki, iki gün əvvəl də Qəzzanın şərqindəki Derec məhəlləsində yerləşən başqa bir tibb mərkəzi İsrail hücumuna məruz qalmışdı. Son hücum isə assosiasiyanın ilk yardım fəaliyyətini tamamilə dayandırıb.
Açıqlamada İsrailin bu hücumlarla Cenevrə Konvensiyaları da daxil olmaqla tibbi personalın və sağlamlıq obyektlərinin toxunulmazlığını təmin edən beynəlxalq hüquq normalarını açıq şəkildə pozduğu vurğulanıb.
“Bu mərkəzin dağıdılması ilə işğalçı ordunun hədəfinə çevrilən Qəzza Zolağındakı bütün tibbi yardım mərkəzləri fəaliyyətini dayandırmış oldu” – deyə bəyanatda qeyd edilib.