BAKI, AzerVoice, Nailə Babazadə

Dünən səhər saatlarından etibarən İsrail ordusunun Qəzza Zolağının müxtəlif bölgələrinə endirdiyi hücumlarda 99 fələstinli həyatını itirib.

AzerVoice xəbər verir ki, xəstəxana mənbələrinin və hadisə şahidlərinin bildirdiyinə görə, İsrail ordusu Qəzzanın müxtəlif bölgələrində fələstinlilərin yaşadığı evləri, çadırları və yardım gözləyən mülki şəxsləri hədəf alıb.

İsrail ordusunun Qəzza Zolağının şimalına endirdiyi hücumlarda 77 fələstinli həyatını itirib.

Cənub bölgələrinə edilən hücumlarda isə 18 mülki şəxs öldürülüb.

Mərkəzi bölgələrə yönəldilmiş ağır hücumlar nəticəsində 4 nəfər həyatını itirib.

İsrail əsgərləri Qəzza şəhərini həm havadan, həm də artilleriya atəşləri ilə hədəf almağa davam edir. Evlər və çoxmərtəbəli binalar dağıdılır.

İsrail ordusu Qəzza Zolağında işğalı genişləndirmək və daimi etmək üçün planlarını həyata keçirməyə başlayıb.

Baş nazir Benyamin Netanyahu Qəzza Zolağının tam şəkildə işğal ediləcəyini açıqlayıb.

İsrail Təhlükəsizlik Kabineti 8 avqustda Qəzza şəhərinin işğalına dair planı təsdiqləyib.

İsrailin müdafiə naziri Yoav Katz isə 15 sentyabrda verdiyi açıqlamada Qəzza şəhərinə yenidən quru hücumlarına başlandıqlarını və şəhəri yox edəcəklərini deyib.

İsrail ordusu bildirib ki, son iki gündə Qəzza şəhərinə 150-dən çox hava və artilleriya zərbəsi endirilib.

Qəzzanın şimalına edilən intensiv bombardman və məcburi təxliyə çağırışları səbəbilə yüzlərlə fələstinli ailə şimaldan cənuba köçməyə davam edir.

Fələstinlilər saatlarla piyada yollarla, bombardman və pilotsuz uçuş aparatlarının təhlükəsi altında, uşaqlarını qucaqlarında daşıyaraq cənuba doğru irəliləyirlər.

Cənuba çatan ailələr isə qida, təmiz su və dərman çatışmazlığı olan müvəqqəti sığınacaqlarda ağır şəraitlərlə üzləşirlər.

Bu köç zamanı “ölüm yolu” adlandırılan yollarda çox sayda mülki şəxs həyatını itirib. Sağ qalanlar isə bu gün təhlükəsiz sığınacaq və əsas insani ehtiyaclar olmadan sağ qalmaq uğrunda mübarizə aparırlar.