BAKI, AzerVoice, Fərid Mikayılov

İsrail ordusu Qəzzada BMT-nin Fələstinli Qaçqınlara Yardım və İşlər Agentliyinə (UNRWA) aid üç məktəbi bombalayıb.

AzerVoice xəbər verir ki, hücumlar Qəzza şəhərinin qərbində yerləşən Əş-Şati qaçqın düşərgəsindəki Es-Sitt Sura, Əl-Aliye və Şuhaybir məktəblərinə endirilib.

Həmin məktəblərdə İsrailin şimal və cənubdakı bombardmanlarından qaçaraq bölgədə sığınan minlərlə məcburi köçkün yaşayırdı.

Görgü şahidlərinin sözlərinə görə, İsrail ordusu hücumdan əvvəl telefon zəngləri ilə əhalini məktəbləri tərk etməyə çağırıb, lakin şəxsi əşyalarını götürmək üçün kifayət qədər vaxt verməyib.

Şahidlər bildiriblər ki, xəbərdarlıqdan sonra insanlar böyük panika və qorxu içində ərazini tərk etməyə çalışıb, lakin İsrail bombardmanı evakuasiya davam edərkən, küçələr hələ də insanlarla dolu olduğu vaxt həyata keçirilib.

Bundan əlavə, İsrail ordusu Ən-Nasr məhəlləsinin qərbində yerləşən Əl-Feyruz qüllələrində çoxmərtəbəli binanı və şəhərin cənubundakı Əs-Sina küçəsində bir evi də hədəfə alıb.

Hələlik hücumlarda ölən və ya yaralananların sayı barədə məlumat verilməyib.