BAKI, AzerVoice

İsrail ordusu bu gün, çərşənbə axşamı Qəzza şəhərində yaşayan bütün sakinlərə və şəhərin bütün məhəllələrində olanlara təxliyə əmri verib. Ordunun bəyanatında sakinlərin Rəşid dəhlizi vasitəsilə Mavasi bölgəsində yerləşən “humanitar zona”ya getmələri tələb olunur.

AzerVoice xəbər verir ki, İsrail ordusunun sözçüsü Aviçay Adrai sosial şəbəkə “X” üzərindən yaydığı açıqlamada bildirib.

“Qəzza şəhərinin bütün sakinlərinə təcili çağırış: qədim şəhərdən Tut əl-Tuffah bölgəsinə qədər şərqdən qərbdəki dənizə qədər — ordu Həmas-ı tamamilə məhv etməkdə qərarlıdır və şəhərdə güclü əməliyyat aparacaq. Öz təhlükəsizliyiniz üçün dərhal Rəşid dəhlizindən Mavasi bölgəsinə gedin. Burada qalmaq olduqca təhlükəlidir.”-deyə o qeyd edib.

İsrailin baş naziri Benyamin Netanyahu isə ötən gün axşam saatlarında Qəzza şəhərinin sakinlərinə müraciət edərək şəhəri dərhal tərk etmələri barədə xəbərdarlıq edib. Netanyahu çıxışında bildirib:

“Qəzza sakinlərinə deyirəm: bu fürsəti dəyərləndirin, sözlərimə diqqətlə qulaq asın — sizə xəbərdarlıq edilib, indi şəhəri tərk edin.”-deyə Netanyahu çıxışında bildirib.

O əlavə edib ki, İsrail qüvvələri hazırda şəhərin içinə toplaşaraq genişmiqyaslı quru əməliyyatına hazırlaşır. Netanyahu həmçinin son iki gün ərzində Qəzzada “HƏMAS-a aid 50 binanın vurulduğunu” açıqlayıb.
“İki gün ərzində 50 terror qülləsini dağıtdıq. Bu isə hələ başlanğıcdır. Əsas hədəf quru əməliyyatının genişləndirilməsidir.”-o bildirib.

HƏMAS İsrailin bu çağırışını qəti şəkildə rədd edərək, bunu “tam miqyaslı zorakı deportasiya cinayəti” adlandırıb. Hərəkat bəyan edib ki, bu addım beynəlxalq qanun və konvensiyaların açıq şəkildə pozulmasıdır.

HƏMAS həmçinin BMT və xüsusilə Təhlükəsizlik Şurasının “bu vəhşiliklər qarşısında susqunluğunu” tənqid edərək bunu “beynəlxalq ikili standartların bariz nümunəsi” kimi qiymətləndirib.