BAKI, AzerVoice, Nailə Babazadə
İsrailin hücumları və blokadası ilə aclıq məcbur edilən Qəzza zolağında son 24 saatda biri uşaq olmaqla daha 6 fələstinli aclıqdan həyatını itirib.
AzerVoice xəbər verir ki, Qəzzadakı Səhiyyə Nazirliyinin yaydığı yazılı açıqlamada aclıqdan həyatını itirənlərlə bağlı son məlumatlar paylaşılıb.
Açıqlamada qeyd olunub ki, son 24 saat ərzində biri uşaq olmaqla daha 6 fələstinli aclıq və qidalanma çatışmazlığı səbəbindən həyatını itirib.
2023-cü ilin 7 oktyabrından bəri Qəzza zolağında aclıqdan ölənlərin sayının 135-i uşaq olmaqla 382-yə çatdığı bildirilib.
Birləşmiş Millətlər Təşkilatının (BMT) dəstəklədiyi İnteqrasiya Olunmuş Qida Təhlükəsizliyi Faza Təsnifatının (IPC) 22 avqustda yaydığı açıqlamada Qəzzada rəsmi olaraq aclıq elan edildiyi və bu tarixdən bəri 20-si uşaq olmaqla 104 nəfərin aclıq və qidalanma çatışmazlığı səbəbindən həyatını itirdiyi vurğulanıb.
IPC tərəfindən yayımlanan son hesabatda bildirilib ki, “15 avqust 2025-ci il tarixinə olan məlumata əsasən Qəzza şəhərindəki aclıq vəziyyəti ‘fəlakət səviyyəsi’ olaraq tanınan 5-ci səviyyədədir və bu, sübutlarla təsdiq olunub.”
Hesabatda həmçinin qeyd olunub: “22 ay davam edən amansız qarşıdurmalardan sonra Qəzza zolağında yarım milyondan çox insan aclıq, yoxsulluq və ölüm ilə səciyyələnən fəlakət şəraitində yaşayır.”
Qəzza “aclıqdan” ölür
İsrailin hücumları və humanitar yardımların daxil olmasına mane olan sərt blokadası altında olan Qəzza zolağında aclıq yayılıb, su, dərman, tibbi ləvazimatlar və gigiyena vasitələri tapılmır, bölgə humanitar fəlakət yaşayır.
Başda uşaqlar olmaqla, Qəzzada aclıqdan ölüm halları artır. Yerli və beynəlxalq qurumlar İsrailin “aclıq və susuzluğu silah kimi” istifadə etdiyini bildirir.
Sivil infrastrukturun da dağıdılması ilə Qəzzanın 88 faizini yerlə bir edən İsrail ordusu, sürgün əmrləri ilə yurdundan didərgin saldığı fələstinliləri tez-tez sığındıqları ərazilərdə hədəfə alır.
Təxminən 2,3 milyon əhalisi olan Qəzzada İsrailin hücumları və sürgün siyasəti nəticəsində yurdlarından didərgin salınanların sayının 2 milyona çatdığı, bir çox insanın dəfələrlə yerini dəyişmək məcburiyyətində qaldığı qeyd olunur.
Əsas ehtiyaclardan məhrum olan didərgin fələstinlilər, müvəqqəti qurulmuş çadırlarda və ya həddindən artıq dolu şəraitdə, gigiyena vasitələrinin çatışmadığı, tualetlərin belə yetersiz olduğu, yoluxucu xəstəliklərin yayıldığı məktəblərdə yaşamağa çalışırlar.
İsrail ordusu isə hər gün həyata keçirdiyi hücumlarla bu didərginlərin çadırlarını və sivil sığınacaq nöqtələrini bombalayır.
İsrailin 7 oktyabr 2023-cü ildən bu yana Qəzza zolağına həyata keçirdiyi hücumlarda azı 64 min 300 fələstinli həyatını itirib, 162 min 5 nəfər isə yaralanıb.
