BAKI, AzerVoice, Nailə Babazadə

İsraildə minlərlə etirazçı Baş nazir Benyamin Netanyahunun Qərbi Qüdsdəki iqamətgahı qarşısında toplanaraq, hökumətdən Qəzza zolağında dərhal atəşkəsə getməyi və əsir mübadiləsi razılaşmasını imzalamağı tələb edib.

AzerVoice xəbər verir ki, Qəzzada HƏMAS tərəfindən saxlanılan israilli əsir Nimrod Cohenin anası Viki Cohen, aksiyada etdiyi çıxışında Netanyahudan, əsirlərlə həmrəyliyi simvolizə edən sarı lent rəmzini yaxasından çıxarmağı tələb edib.

“Netanyahu, bizimlə olduğunu söyləməyi dayandır. Əgər həqiqətən bizimlə olsaydın və bizi önəmsəsəydin, bu gün oğlum evdə olardı,” – deyə Cohen bildirib.

Əsirlərlə bağlı aksiya sonrasında yüzlərlə etirazçı Qərbi Qüdsdə tramvay dayanacağında yolları bağlayaraq nəqliyyatın hərəkətinə mane olub. Oturaq etiraz keçirən iştirakçılara qarşı polis güc tətbiq edərək onları bir-bir ərazidən uzaqlaşdırıb. Səlahiyyətlilər bu etirazı “şiddətli iğtişaş” kimi dəyərləndirib.

Netanyahunun iqamətgahı yaxınlığında səhər saatlarında keçirilən etiraz zamanı yandırılan zibil konteynerindən sıçrayan alov bir avtomobili külə döndərib. Hadisə ilə bağlı 60 və 80 yaşlarında iki etirazçı saxlanılıb. Alovun yaxınlıqdakı binalara yayılma təhlükəsi səbəbindən sakinlər təxliyə olunub.

Bundan başqa, Baş nazirlik binası yaxınlığında avtomobil təkərlərinin də yandırıldığı bildirilib.
Baş nazir Benyamin Netanyahu axşam saatlarında yayımladığı videomüraciətində, aksiyaların "hökumətə qarşı təşkil edilmiş və maliyyələşdirilən" olduğunu bildirib.

“Mənə və ailəmə qarşı hər gün onlarca ölüm təhdidi alıram. Onlar deyirlər ki, mənim evimi – Baş nazirin iqamətgahını – faşist milislər kimi alova bürüyəcəklər,” – deyə Netanyahu vurğulayıb.

Netanyahu polisə qarşı da tənqid səsləndirərək, etirazçılara qarşı qanunun daha sərt tətbiq edilməsini tələb edib.
O, yanan avtomobilin, bir vaxtlar İsrailin maliyyə və ədliyyə naziri olmuş Yaakov Neemanın nəvəsi – ehtiyatda olan binbaşı Yoav Bar İşay’a aid olduğunu iddia edib.

İsraildə əsir ailələri və müxalifət, Netanyahu hökumətini Qəzzada atəşkəs və əsir mübadiləsi razılaşmasından “qəsdən yayınmaqda” və bölgədə işğal siyasəti ilə əsirlərin həyatını təhlükəyə atmaqda ittiham edir.