BAKI, AzerVoice, Səməd Əyyubov
HƏMAS-ın hərbi qolu olan “İzzəddin əl-Qəssam Briqadaları” İsrail ordusunun Qəzza zolağında “Gideon arabaları – 2” əməliyyatına cavab olaraq yeni hərbi əməliyyata başlayıb.
AzerVoice xəbər verir ki, bu barədə diplomatik mənbələr məlumat yayıb.
Məlumata görə, əməliyyata “Musanın Dəyənəyi” adı verilib. İlk hücumlar İsrail ordusunun əməliyyata başladığını elan etdiyi vaxtla eyni anda Qəzza zolağının şimalındakı Zeytun məhəlləsi və Cəbəliyyə düşərgəsində həyata keçirilib.
“Qəssam Briqadaları” həmçinin Qəzza şəhərindəki İsrail qüvvələri və hərbi texnikasının müxtəlif silahlarla hədəfə alındığını təsdiqləyib.
Xatırladaq ki, bu gün İsrail Ordusunun Baş Qərargah rəisi Eyal Zamir Qəzza zolağında “Gideon arabaları” əməliyyatının ikinci mərhələsinin başladığını bəyan edib.