BAKI, AzerVoice, Nailə Babazadə

İsrail ordusunun Qəzza zolağına endirdiyi hücumlarda son 24 saat ərzində 113 fələstinli həyatını itirib, 304 nəfər yaralanıb.

AzerVoice xəbər verir ki,Qəzzadakı Səhiyyə Nazirliyinin yaydığı yazılı açıqlamada İsrailin davam edən hücumları nəticəsində baş verən itkilərlə bağlı son məlumatlar ictimaiyyətlə paylaşılıb.

Məlumata görə, İsrail ordusunun 19 yanvarda əldə olunan atəşkəsi pozaraq 18 martdan etibarən başladığı hücumlarda indiyədək 11 min 615 fələstinli həyatını itirib, 49 min 204 nəfər isə yaralanıb.

Son 24 saat ərzində Qəzzada humanitar yardım almaq üçün növbədə dayanan insanların hədəf alındığı hücumlarda 33 fələstinli öldürülüb, 141 nəfər isə yaralanıb.

İsrail və ABŞ tərəfindən idarə olunan guya "yardım paylama məntəqələrində" fələstinlilərin sistematik şəkildə hədəf alındığı hücumlarda, 27 may tarixindən bəri öldürülənlərin sayı 2 min 339 nəfərə, yaralananların sayı isə 17 min 70 nəfərə çatıb.

İsrailin 7 oktyabr 2023-cü ildən bu yana Qəzza zolağına davam edən hücumlarında həyatını itirənlərin ümumi sayı 63 min 746 nəfər, yaralananların sayı isə 161 min 245 nəfər olaraq açıqlanıb.

Qəzza zolağında hələ də minlərlə meyitin dağıntılar altında qaldığı bildirilir.

Eyni zamanda, İsrailin sərhəd keçidlərini bağlaması və humanitar yardımın girişini məhdudlaşdırması səbəbilə aclığa sürüklənən Qəzzada son 24 saat ərzində 6 fələstinli aclıqdan həyatını itirib. Beləliklə, 7 oktyabrdan bəri aclıq səbəbilə ölənlərin sayı 131-i uşaq olmaqla 367 nəfərə yüksəlib.