BAKI, AzerVoice, Nailə Babazadə

İsrail ordusunun bu səhər saatlarında Qəzza zolağının müxtəlif bölgələrinə həyata keçirdiyi hava hücumları nəticəsində, aralarında uşaqlar və məcburi köçkün fələstinlilərin də olduğu 19 nəfər həlak olub.

AzerVoice xəbər verir ki, xəstəxana mənbələrinin və hadisə şahidlərinin verdiyi məlumata görə, Qəzza şəhərinin qərbində yerləşən Şati Qaçqınlar Düşərgəsi ətrafında bir evə hava hücumu təşkil olunub. Hücum nəticəsində hamilə qadın, iki uşaq daxil olmaqla 3 nəfər həlak olub.

Şati düşərgəsində məcburi köçkünlərin yaşadığı bir çadır da bombalanıb, nəticədə 1 fələstinli həyatını itirib.

Eyni düşərgənin Kavka döngəsi yaxınlığında yerləşən bir evə edilən hava hücumunda isə çox sayda fələstinli yaralanıb.

Qəzzanın mərkəzi hissəsindəki Nafak küçəsində yerləşən və məcburi köçkünlərin yaşadığı evə təşkil olunan hava hücumu nəticəsində 5 fələstinli ölüb, çox sayda insan isə yaralanıb.

İsrail qüvvələri həmçinin Qəzza şəhərinin mərkəzində yerləşən Sahabə Xəstəxanası ətrafında bir binanı hava zərbələri ilə vurub. Bir ailə – ər, arvad və uşaqları olmaqla 3 nəfər bu hücumda həyatını itirib.

Şəhərin şimalındakı Şeyx Rıdvan məhəlləsində yerləşən bir evin bombalanması nəticəsində isə 4 fələstinli həlak olub, yaralananlar da var.

İsrail ordusu Qəzzanın cənubundakı Zeytun məhəlləsində fələstinlilərə məxsus evləri və digər tikililəri partlatmağa davam edir.

Bundan əlavə, şəhərin şərqindəki Şucaiyyə məhəlləsi də İsrail hərbi təyyarələri tərəfindən şiddətli bombardmana məruz qalır.

Qəzza zolağının mərkəzində yerləşən Bureyc Qaçqınlar Düşərgəsində bir evə təşkil edilən hava hücumu nəticəsində bir ailə – ər, arvad və qız uşaqları olmaqla 3 nəfər həyatını itirib.

Eyni zamanda, xəstəxana yaxınlığında yerləşən bir çadır pilotsuz uçuş aparatı (PUA) ilə hədəfə alınıb, bu hücumda çox sayda insan yaralanıb.