BAKI, AzerVoice, Nailə Babazadə

2023-cü il 7 oktyabrdan bu yana İsrailin Qəzza zolağına davamlı şəkildə həyata keçirdiyi intensiv hücumlar nəticəsində yaranan ağır dağıntılar havadan görüntülənib.

AzerVoice xəbər verir ki, görüntülər Qəzzaya havadan humanitar yardım atan bir təyyarədən çəkilib və Amerikanın X (əvvəlki Twitter) sosial media platformasında paylaşılıb.

Kadrlarda, 22 aya yaxındır davam edən İsrail hücumlarının yaratdığı böyük miqyaslı dağıntı və xarabalıqlar diqqət çəkir. Qəzzanın şimalında yerləşən Beyt Hanun və Beyt Lahiyə bölgələrində demək olar ki, ayaqda qalan bina qalmayıb.

Eyni şəkildə, Cibaliya bölgəsində də vəziyyət son dərəcə ağırdır. Görüntülərdə həyat əlamətinin qalmadığı bu bölgənin tamamilə boz tonlara büründüyü müşahidə olunur.

Qəzza şəhər mərkəzinə gəlindikdə isə, İsrail hücumlarından sonra ağır zədələnmiş binalar və zorla yerindən edilən fələstinlilərin sığındığı yüzlərlə çadır nəzərə çarpır.

İsrailin hücumları, xüsusilə Qəzzanın şimal hissələrində kütləvi dağıntılara səbəb olub.

Birləşmiş Millətlər Təşkilatının (BMT) məlumatına görə, 160 min yaşayış evi tamamilə dağıdılıb, 276 min ev isə ya ciddi şəkildə, ya da qismən zədələnib.

Bu rəqəmlər Qəzza zolağındakı evlərin 92 faizinin ya tamamilə məhv edildiyini, ya da yaşanılmaz hala düşdüyünü göstərir.

Bundan əlavə, çox sayda İsrail əsgəri 7 oktyabrdan bu yana fələstinlilərə məxsus evlərin iş maşınları ilə dağıdılması görüntülərini şəxsi sosial media hesablarında yayımlayıb.

İsrail ordusunda xidmət edən haham Avraham Zerbib isə yerli televiziyada qatıldığı bir proqramda Qəzzada fələstinlilərin evlərini dağıtdığını fəxrlə danışıb. O, orduda xidmət etdiyi dövrdə Qəzzada həftədə təxminən 50 evi dağıtdığını, bu evlərin çoxunun çoxmərtəbəli olduğunu və iki mərtəbəli evin belə onu qane etmədiyini bildirib.