BAKI, AzerVoice, Nərmin Ağayeva

Qəzzada işğal planı təsdiqlənib, ancaq Netanyahu razılığa mane olur.

AzerVoice xəbər verir ki, HƏMAS hərəkatı vasitəçilərin təklifini qəbul etdikdən sonra İsrailin baş naziri Benyamin Netanyahunun Qəzzada işğal planı ilə razılaşmaya mane olduğunu açıqlayıb. Hərəkatın bəyanatında Netanyahunun məhbus mübadiləsi və atəşkəs razılaşmalarına əsas maneə olduğu vurğulanıb.

“Biz qismən razılaşmanı qəbul etdik və hərtərəfli razılaşmaya hazır olduğumuzu nümayiş etdirdik, lakin Netanyahu bütün həll yollarını rədd edir”, – deyə HƏMAS bəyan edib. Qruplaşma Netanyahunun hər dəfə razılaşma yaxınlaşanda yeni şərtlər irəli sürdüyünü və danışıqları gecikdirdiyini bildirib. Bəyanatda həmçinin İsrailin soyqırım və aclıq siyasətinə qarşı rəsmi və ictimai təzyiqlərin artırılmasına çağırış edilib.

Qeyd edək ki, avqustun 8-də İsrail Təhlükəsizlik Kabineti Qəzzanın şimalında işğal planını təsdiqləyib. Netanyahu bütün Qəzza zolağının işğalını hədəflədiklərini açıqlayıb. Plana əsasən, birinci mərhələdə təxminən bir milyon fələstinli cənuba köçürüləcək, şəhər mühasirəyə alınacaq və intensiv hücumların ardından işğal ediləcək. İkinci mərhələdə isə Qəzzanın mərkəzində yerləşən qaçqın düşərgələrinin nəzarətə götürülməsi nəzərdə tutulur.