BAKI, AzerVoice, Səməd Əyyubov

İsrailin baş naziri Benyamin Netanyahu Qəzza ilə bağlı Misir və Qətər vasitəçilərinin təqdim etdiyi və HƏMAS-ın da qəbul etdiyi son təklifi rədd edib.

AzerVoice xəbər verir ki, İsrail İctimai Yayım Şirkətinin məlumatına əsasən, Netanyahu qismən razılaşmanı rədd edərək bütün girovların eyni anda azad olunmasını tələb edib və “Heç bir girovu arxada qoymayacağıq” - deyə bildirib.

Bundan bir neçə saat əvvəl Qətər Xarici İşlər Nazirliyinin sözçüsü Məcid əl-Ənsari HƏMAS-ın Misir-Qətər təklifinə çox müsbət cavab verdiyini açıqlamışdı. O, həmçinin HƏMAS-ın cavabının İsrailin daha əvvəl qəbul etdiyi şərtlərlə üst-üstə düşdüyünü vurğulamışdı.

Əl-Ənsarinin sözlərinə görə, təklif ABŞ-ın xüsusi elçisi Stiven Uitkoffun irəli sürdüyü planla da uyğunluq təşkil edir.

“HƏMAS-ın dünən qəbul etdiyi şərtlər Uitkoffun təklifinə 98 faiz uyğun gəlir” - deyə, o bildirib.

Qeyd edək ki, misirli mənbənin verdiyi məlumata görə, yenilənmiş təklif İsrailin hərbi əməliyyatlarını 60 gün müddətinə dayandırmasını və təxminən iki ildir davam edən müharibəni bitirəcək hərtərəfli razılaşmaya aparan yolu nəzərdə tutur.

Təklif həmçinin blokadada olan Qəzzaya humanitar yardımın daxil olmasına şərait yaradır, bunun müqabilində İsrailli girovların iki mərhələdə azad edilməsini nəzərdə tutur – hər mərhələdə 10 nəfər olmaqla, üstəlik təxminən 18 cəsədin də qaytarılması planlaşdırılır.

Hazırda İsrail bölgənin 75 faizinə nəzarət edir. Bu gün İsrail Silahlı Qüvvələrinin Baş Qərargah rəisi Eyal Zamir şəhərin işğalına dair yekun planı müdafiə naziri İsrael Katsa təqdim edəcək.