BAKI, AzerVoice, Zeynəb Raminqızı

İsrail ordusunun bu gün səhərdən etibarən Qəzza zolağının müxtəlif bölgələrinə hücumlar nəticəsində ən azı 18 fələstinli həyatını itirib, onlarla insan isə yaralanıb.

AzerVoice xəbər verir ki, Xan Yunisin qərbində köçkünlərin yerləşdiyi çadırlardan biri hədəfə alınaraq dağıdılıb, nəticədə bir neçə nəfər həlak olub. Daha sonra bölgədəki digər çadıra endirilən zərbə nəticəsində əlavə ölüm və yaralıların olduğu bildirilib.

Deyr əl-Bələh şəhərində də oxşar hadisə qeydə alınıb. Köçkünlərin sığındığı çadırın vurulması nəticəsində bir neçə nəfər həyatını itirib. Bundan başqa, şəhərin cənub-şərqində mülki şəxslərin toplandığı əraziyə hücum nəticəsində də ölənlər qeydə alınıb.

Qəzza şəhərinin qərbində, “Zikim” bölgəsində yardım növbəsində gözləyən fələstinlilərə qarşı hücum zamanı iki nəfər həlak olub, 50-dən çox insan yaralanıb.

Ötən gecə isə İsrailin Qəzzanın cənubundakı əs-Sabra məhəlləsinə və Deyr əl-Bələhə endirdiyi zərbələr nəticəsində daha bir neçə nəfərin öldüyü, bir neçə nəfərin isə yaralandığı bildirilib.

Qeyd edək ki, Fələstin mənbələrinin məlumatına görə, 2023-cü il 7 oktyabrdan bəri davam edən hücumlar nəticəsində Qəzzada indiyədək 62 mindən çox fələstinli həyatını itirib, 156 mindən artıq insan isə yaralanıb. Rəqəmlərin dəqiq olmadığı, minlərlə qurbanın hələ də dağıntılar altında qaldığı vurğulanır.