BAKI, AzerVoice, Səməd Əyyubov

İsrail ordusunun Qəzza zolağına son 24 saat ərzində həyata keçirdiyi hücumlar nəticəsində 51 fələstinli həlak olub, 369 nəfər yaralanıb.

AzerVoice xəbər verir ki, bu barədə Fələstin Səhiyyə Nazirliyi məlumat yayıb.

Məlumata görə, 2023-cü il oktyabrın 7-dən bəri Qəzza zolağında davam edən hücumlarda həlak olan mülki şəxslərin ümumi sayı 61 827-yə, yaralananların sayı isə 155 275-ə çatıb.

Məlumatda bildirilir ki, İsrailin martın 18-dən etibarən atəşkəs razılaşmasını pozmasından sonra indiyədək 10 300 nəfər ölüb, 43 234 nəfər yaralanıb. Son sutkada isə bölgədə humanitar yardım paylanması zamanı İsrailin açdığı atəş nəticəsində 17 nəfər həyatını itirib, 250 nəfər yaralanıb. Beləliklə, yardım paylanması zamanı ölənlərin ümumi sayı 1 898-ə, yaralananların sayı isə 14 113-ə yüksəlib.

Nazirliyin məlumatına görə, İsrailin bölgəyə ərzaq və humanitar yardımın çatdırılmasına mane olması səbəbindən aclıqdan ölənlərin siyahısına son 24 saatda daha bir qız uşağı əlavə olunub. Beləliklə, aclıq və qidalanma çatışmazlığı səbəbindən həyatını itirənlərin sayı 107-si uşaq olmaqla 240 nəfərə çatıb.

Hazırda Qəzza zolağında vəziyyət son dərəcə gərgindir. İsrail ordusunun hücumları davam edir və bölgədə humanitar böhran getdikcə daha da dərinləşir.