BAKI, AzerVoice, Nailə Babazadə

İsrailin ağır hücumları və humanitar yardımların qarşısını alan mühasirəsi altındakı Qəzza zolağında aclıq can almağa davam edir. Son 24 saat ərzində aralarında 3 uşağın da olduğu 8 fələstinli aclıq və qidalanma çatışmazlığı səbəbilə həyatını itirib.

AzerVoice xəbər verir ki, Qəzzə Səhiyyə Nazirliyinin baş direktoru Munir əl-Burş, ABŞ mərkəzli sosial media platformasında verdiyi açıqlamada, aclıq səbəbilə ölənlərin ümumi sayının 106-sı uşaq olmaqla 235-ə çatdığını bildirib.

Qəzzə hazırda ərzaq, təmiz su, dərman və gigiyena vasitələrinin çatışmazlığı ilə müşayiət olunan ağır bir humanitar fəlakət yaşayır. İsrailin ablukası, sivil infrastrukturun dağıdılması və yardım kanallarının bağlanması səbəbindən bölgədə vəziyyət kritik həddə çatıb.

Təxminən 2,3 milyon əhalisi olan Qəzzədə İsrailin hücumları və məcburi köçürmə əmrləri nəticəsində 2 milyona yaxın insan yerindən edilib. Aclıqdan və yoxsulluqdan əziyyət çəkən əhali, çadırlarda və insanlarla dolu məktəblərdə minimal gigiyena şəraitində sağ qalmağa çalışır.

Beynəlxalq müşahidəçilər və hüquq təşkilatları İsrailin "aclıq və susuzluğu bir silah kimi" istifadə etdiyini bildirirlər. İsrail ordusu isə gündəlik bombardmanlarla məcburi köçkünlərin sığındığı çadırları və digər mülki obyektləri hədəf almağa davam edir.