BAKI, AzerVoice, Nərmin Ağayeva

Hələbdə Suriya ordusu ilə PKK/YPG arasında silahlı toqquşma baş verib.

AzerVoice xəbər verir ki, Suriya Müdafiə Nazirliyinin Media və Kommunikasiyalar İdarəsi Hələbin şərqindəki Tel Maez bölgəsində PKK/YPG terror təşkilatına bağlı qrupların Suriya ordusunun mövqelərinə sızmaq cəhdindən sonra qarşıdurma yaşandığını bildirib. Hadisə zamanı 1 Suriya əsgəri şəhid olub.

Nazirliyin məlumatına görə, hadisə yerli vaxtla saat 02:35 radələrində baş verib. Sızma cəhdinə cavab olaraq Suriya ordusu atəşin açıldığı mövqeləri hədəfə alıb və hücum edənləri geri çəkilməyə məcbur edib. Nazirlik bildirib ki, bu hadisə PKK/YPG-nin (SDQ) Mənbic və Deyr Hafir bölgələrində ordu mövqelərinə hücumları, eləcə də Hələbdəki bəzi nəzarət-buraxılış məntəqələrindən mülki yolları bağlama cəhdləri ilə eyni vaxtda baş verib.

Qeyd edək ki, Nazirlik SDQ-dən Suriya dövləti ilə imzalanmış razılaşmalara əməl etməyi, sızma və təxribatlara son qoymağı tələb edib, əks halda bu cür addımların gələcəkdə ciddi nəticələrə gətirib çıxaracağı barədə xəbərdarlıq edib.