BAKI, AzerVoice, Nailə Babazadə

İsrail ordusunun hücumlarını davam etdirdiyi, blokada altında saxladığı Qəzza zolağında yardım gözləyənlərin də aralarında olduğu 6 fələstinli həlak olub, çox sayda insan yaralanıb.

AzerVoice xəbər verir ki, xəstəxana mənbələri və hadisə şahidlərindən aldığı məlumata görə, İsrail ordusu Qəzza zolağında həm mülki evləri, həm də yardım almaq üçün toplaşan fələstinliləri hədəfə alıb.

İsrail əsgərlərinin, Qəzza zolağının mərkəzində yerləşən Netzarim kəsişməsi yaxınlığında qurulan guya ABŞ tərəfindən təşkil edilən yardım paylama mərkəzinin ətrafında gözləyən fələstinlilərə atəş açması nəticəsində 3 nəfər əlak olub.

Qəzzanın şimalındakı ət-Tuffah məhəlləsində İsrail hərbi təyyarələrinin həyata keçirdiyi hücumlarda isə ən azı 1 mülki şəxs həlak olub, çox sayda insan yaralanıb.

Qəzza zolağının mərkəzində yerləşən Nusəyrat qaçqın düşərgəsi də İsrail hərbi təyyarələri tərəfindən hədəfə alınıb, lakin bu hücumla bağlı ölü və ya yaralı sayı barədə məlumat verilməyib.

Qeyd edək ki, İsrail ordusu Qəzza zolağında 19 yanvarda qüvvəyə minmiş atəşkəsi pozaraq, 18 mart səhərindən etibarən şiddətli hücumlara yenidən başlayıb.

İsrailin 7 oktyabr 2023-cü ildən bu yana Qəzza zolağına təşkil etdiyi hücumlarda azı 61 min 258 fələstinli həyatını itirib, 152 min 45 nəfər isə yaralanıb.

İsrailin 18 martda atəşkəsi pozmasından sonra Qəzzaya yönəltdiyi hücumlarda 9 min 752 nəfər həyatını itirib, 40 min 4 nəfər isə yaralanıb.

27 maydan bu yana İsrail və ABŞ-ın nəzarətində olan “Qəzza Humanitar Yardım Fondu” adı altında qurulan yardım bölgələrində sistemli şəkildə həyata keçirilən hücumlar nəticəsində hədəfə alınan fələstinlilərdən 1706 nəfər ölüb, 12 min 230 nəfər isə yaralanıb.