BAKI, AzerVoice, Səməd Əyyubov

İordaniyanın xarici işlər naziri Əymən əs-Səfədi bildirib ki, 1967-ci il iyunun 4-dəki sərhədlər əsasında, paytaxtı Şərqi Qüds olan Fələstin dövlətinin qurulması bölgədə ədalətli və hərtərəfli sülhün təmin olunmasının yeganə yoludur.

AzerVoice xəbər verir ki, bu barədə İordaniya Xarici İşlər Nazirliyinin, Səfədinin Çexiyalı həmkarı Yan Lipavski ilə telefon danışığından sonra yaydığı bəyanatda bildirilib.

Bəyanatda Qəzza zolağında humanitar böhranın qarşısını almaq üçün bütün sərhəd-keçid məntəqələrinin açılması və təcili yardımların bölgəyə daxil olmasına şərait yaradılması məqsədilə səylərin birləşdirilməsinin vacibliyi vurğulanıb.

Tərəflər Qəzzada daimi atəşkəsin əldə olunması istiqamətində görülən işləri, eləcə də bu istiqamətdə Misir, Qətər və ABŞ-ın təşəbbüslərinə verilən dəstəyi müzakirə ediblər.

Qeyd edək ki, hazırda BMT-yə üzv olan 193 ölkədən 147-si Fələstini tanıyır. Bu ölkələrə tezliklə Fransa, Böyük Britaniya, Malta və Kanada da qoşulacaq. Fransa prezidenti Emmanuel Makron, ölkəsinin sentyabr ayında Fələstin Dövlətini rəsmən tanıyacağını bəyan edib. Eyni açıqlamalar Kanada baş naziri və Malta hökuməti tərəfindən də verilib.

Ekspertlərin fikrincə, Avropa ölkələrinin bu istiqamətdə atdığı addımlar, İsrail-Fələstin siyasətində yeni mərhələnin başlaya biləcəyini göstərir.