BAKI, AzerVoice, Zeynəb Raminqızı

İsrail ordusunun Qəzza zolağına təşkil etdiyi hücumlarda 9-u humanitar yardım gözləyən şəxs olmaqla, ümumilikdə 20 fələstinli həyatını itirib.

AzerVoice xəbər verir ki, İsrailin hücumları Qəzzanın cənub, mərkəz və şimal hissələrində yerləşən çadırlar, evlər və yardım gözləyən mülki əhalini hədəf alıb.

Netzarim bölgəsində, ABŞ-ın yardım paylama mərkəzinin yaxınlığında yardım üçün toplaşan insanlara açılan atəş nəticəsində 6 fələstinli ölüb. Xan Yunisin qərbindəki Mavasi bölgəsində köçkün çadırlarına edilən hava hücumu isə 5 nəfərin həyatına son qoyub.

Nusəyrat Qaçqınlar Düşərgəsinin Əbu Mualla bölgəsində artilleriya hücumu nəticəsində biri qadın olmaqla 2 nəfər, eyni zamanda əl-Tina küçəsindəki yardım paylama nöqtəsində baş verən hücumda isə 3 fələstinli həlak olub.

Qəzza şəhərində baş verən iki ayrı hava hücumunda daha 4 nəfər ölüb. Şeyx Radvan məhəlləsində və Əl-Nəfəq küçəsindəki yaşayış yerlərinə zərbələr endirilib, xeyli sayda insan yaralanıb.

Qəzza Səhiyyə Nazirliyi bildirir ki, mayın 27-də ABŞ-ın dəstəyi ilə tətbiq olunan Humanitar Yardım Fondu mexanizminə baxmayaraq, yardım gözləyən mülki əhaliyə edilən hücumlarda 1516 nəfər ölüb, 10067 nəfər yaralanıb.

Qeyd edək ki, 2023-cü il oktyabrın 7-dən bəri Qəzzada davam edən münaqişədə İsrail, beynəlxalq çağırışlara baxmayaraq, qadın və uşaqların üstünlük təşkil etdiyi 210 mindən çox fələstinlini öldürüb və ya yaralayıb. Bölgədə məcburi köçkünlük, aclıq, infrastrukturun məhv edilməsi və insan itkisi fəlakət həddinə çatıb.