BAKI, AzerVoice, Nailə Babazadə

Birləşmiş Millətlər Təşkilatının Uşaq Fondunun (UNICEF) bəyanatına görə, Qəzzada 22 ay ərzində 18 mindən çox uşaq öldürülüb və "Qəzzada hər gün orta hesabla bir sinif dolusu uşaq öldürülür" ifadəsinə yer verilib.

AzerVoice xəbər verir ki, UNICEF Qəzzadakı hadisələrlə bağlı X sosial media platformasında rəsmi açıqlama yayıb.

Açıqlamada qeyd olunub ki, uşaqlar bombardman, aclıq, qıtlıq və əsas xidmətlərə çıxışın olmaması səbəbindən həyatlarını itirirlər.

Açıqlamada vurğulanıb ki, hər gün təxminən 28 uşaq, 22 ay ərzində isə 18 mindən çox uşaq öldürülüb.

Açıqlamada həmçinin bildirilib ki, Qəzzadakı uşaqların təcili şəkildə qida, su, dərman və qorunmaya ehtiyacı var.

Qeyd edək ki, 2023-cü il oktyabrın 7-də başlayan münaqişənin kəskinləşməsi nəticəsində Qəzzada ölənlərin ümumi sayı 60 430 nəfərə çatıb, 148 mindən çox insan isə yaralanıb.

Həmçinin qeyd edək ki, bu il martın 2-dən etibarən Qəzza zolağına beynəlxalq humanitar yardım çatdırılmır. İsrail hakimiyyətinin qərarına əsasən, bütün nəzarət-buraxılış məntəqələri bağlanıb. Ərzaq paylanması isə İsrail və ABŞ-ın nəzarətində olan “Qəzza Humanitar Yardım Fondu” vasitəsilə həyata keçirilir.

Yanvar ayında əldə edilmiş atəşkəsə baxmayaraq, mart ayında İsrail ordusu Qəzzada hərbi əməliyyatları bərpa edib. Qətər, Misir və ABŞ-ın vasitəçiliyi ilə keçirilən bir neçə danışıqlar raundunda tərəflər yeni razılaşma şərtləri üzərində razılaşa bilməyiblər.