BAKI, AzerVoice, Zeynəb Raminqızı

ABŞ prezidenti Donald Tramp Qəzzadakı müharibəni “soyqırımı” kimi görmədiyini bildirib. O, 2023-cü il 7 oktyabrda “Həmas”ın hücumu zamanı “dəhşətli hadisələrin baş verdiyini” vurğulayıb.

AzerVoice xəbər verir ki, jurnalistlər Trampdan İsrailin 7 oktyabr hücumuna cavabının “soyqırımı” olub-olmadığını soruşduqda, o, “Mən elə düşünmürəm” –deyib.

“Onlar (israillilər) müharibədədir”, -deyən Tramp, 7 oktyabr hücumunun dəhşətlərindən danışıb.

Qəzza ilə bağlı suala cavabında Tramp ABŞ-ın bölgədəki fələstinlilərə ərzaq təmin etmək üçün çalışdığını təkrarlayıb.

“Biz insanlara yemək vermək istəyirik… İsrailin onlara yemək verməsini istəyirik, insanların ac qalmasını istəmirik, aclıqdan ölmələrini istəmirik”-deyə o qeyd edib.

Qəzza Səhiyyə Nazirliyi bazar günü açıqlayıb ki, aclıq və qidalanma çatışmazlığı səbəbindən son 24 saatda 6 nəfər ölüb. Onların hamısı böyüklərdir. Bununla, aclıq və qidalanma çatışmazlığından ölənlərin ümumi sayı 175 fələstinliyə çatıb, onlardan 93-ü uşaqdır.

BMT-yə görə, 7 oktyabr 2023-də HƏMAS-ın İsrailə hücumu ilə başlayan və 22 aydır davam edən dağıdıcı müharibə nəticəsində Qəzza zolağı genişmiqyaslı aclıq təhlükəsi ilə üz-üzədir və tamamilə humanitar yardımlardan asılı vəziyyətdədir. Bu yardımlar ya yük maşınları ilə, ya da havadan atılmaqla çatdırılır.

İsrail, mart ayının əvvəlində bölgəyə tam blokada tətbiq edərək ərzaq, dərman və əsas ehtiyac mallarında kəskin qıtlıq yaradıb. May ayının sonunda isə bəzi yardımların daxil olmasına icazə verib. Bu yardımlar İsrail və ABŞ tərəfindən dəstəklənən “Qəzza Humanitar Fondu” vasitəsilə paylanır. Lakin beynəlxalq yardım təşkilatları bu qurumu etibarlı hesab etmədikləri üçün onunla əməkdaşlıqdan imtina edirlər.