BAKI, AzerVoice , Fərid Mikayılov

Səhər saatlarında İsrail ordusunun Qəzza zolağının müxtəlif bölgələrinə endirdiyi hava və artilleriya zərbələri nəticəsində azı 22 fələstinli həyatını itirib.

AzerVoice xəbər verir ki, həlak olanlar arasında qadın və uşaqlar da var.

Qəzza şəhərinin qərbində yerləşən Şəfa xəstəxanasına “Netsarim” bölgəsindəki yardım paylama nöqtəsindən 12 nəfərin cəsədi gətirilib. Qeyd edilir ki, onlar yardım almaq üçün növbəyə duran mülki şəxslər olublar.

Bundan əlavə, Xan Yunusun şimalında yerləşən sənaye yolayrıcısı yaxınlığında qaçqınlara məxsus çadırlara israilli pilotsuz uçuş aparatı tərəfindən hücum təşkil olunub. Nəticədə orada yaşayan ailələrin birindən üç nəfər həlak olub, bir neçə nəfər isə yaralanıb.

Eyni zamanda, Xan Yunusun şimal-qərbində yerləşən çadır düşərgəsinə endirilən hava zərbəsi nəticəsində iki qadın həyatını itirib.

Fələstinli rəsmilər və yerli mənbələr bildirirlər ki, İsrailin son hücumları nəticəsində mülki əhali arasında itkilər artır, xüsusilə qadınlar, uşaqlar və humanitar yardım növbəsində dayanan şəxslər daha çox hədəfə çevrilir.

Hazırda Qəzza zolağında vəziyyət kritik olaraq qalmaqda davam edir. Beynəlxalq təşkilatlar bölgədə humanitar fəlakətin dərinləşdiyini bildirir və mülki əhalinin qorunmasına çağırış edirlər.