BAKI, AzerVoice

İsrailin ifrat sağçı maliyyə naziri Bezalel Smotriç Qəzzanın "İsrailin ayrılmaz hissəsi" olduğunu iddia edib.

AzerVoice xəbər verir ki, bu barədə Smotriç Qəzzada qeyri-qanuni yaşayış məntəqələrinin təmizlənməsinin 20-ci ildönümünə həsr olunmuş tədbirdə çıxışında bildirib.

O, 2005-ci ildə boşaldılan Quş Kətif qəsəbəsinin yenidən qurulmasının artıq “xəyal” olmadığını və bunun çox yaxın olduğunu müdafiə edib.

İsrailin Qəzzanı ilhaq etmək planları davam edərkən Smotriç, "Biz Qəzzanı bir ərəb ölkəsinə vermək üçün bu qiyməti ödəmədik. Bura İsrail ərazisidir"- deyə qeyd edib.

Fələstin torpaqlarını qəsb edən İsrail hökumətinin naziri Smotriç İordan çayının qərb sahilinin də ilhaq ediləcəyini bildirib.

İsrail mediası baş nazir Benyamin Netanyahunun Smotriç və digər ifrat sağçı fiqurları sakitləşdirmək üçün Qəzzanın bəzi hissələrinin ilhaqını ehtiva edən təhlükəsizlik kabinetinə plan təqdim etdiyini bildirib.

Smotrich və milli təhlükəsizlik naziri Ben-Qvir kimi şəxslər Qəzzanın tam işğalını və fələstinlilərin başqa ölkələrə deportasiyasını müdafiə edirlər.

İsrail 1967-ci ildə işğal etdiyi Qəzzada Fələstin torpaqlarını qəsb edib və orada yəhudiləri məskunlaşdırıb. Bu köçkünlər 2005-ci ildə o vaxtkı baş nazir Ariel Şaronun geri çəkilmə qərarından sonra Qəzzadan təxliyə edilib.