BAKI, AzerVoice
İsrailin keçmiş baş naziri Naftali Bennet, hazırkı baş nazir Benyamin Netanyahunun vəzifəsini tərk etməli olduğunu deyib və onun ölkəni idarə etmə tərzini “fəlakətli” adlandırıb.
“Netanyahu artıq 20 ildir ki, hakimiyyətdədir... Bu, həddindən artıq uzun müddətdir. Bu, doğru deyil.İsrail cəmiyyətindəki parçalanmanın əsas məsuliyyətini daşıyır” və “vəzifədən getməlidir”-deyə o bildirib.
Qeyd edək ki, Naftali Bennet 2021-ci ildə “Yeni Sağ” partiyasının lideri kimi Netanyahunu 12 illik fasiləsiz iqtidardan uzaqlaşdırmağa müvəffəq olmuşdu. Lakin onun müxalifət lideri Yair Lapidlə qurduğu zəif koalisiya hökuməti cəmi bir il davam edə bildi.
Bennet həmin uğursuz koalisiyadan sonra keçirilən növbədənkənar parlament seçkilərində iştirak etmədi. Bu seçkilər nəticəsində Netanyahunun rəhbərlik etdiyi sağçı və ultra-ortodoks partiyalar hakimiyyətə qayıtdı.
Lakin son aylarda Bennetin siyasətə qayıtmağa hazırlaşdığı müşahidə olunur. AFP -nin məlumatına görə, bir sıra rəy sorğuları Bennetin mümkün seçkilər zamanı Netanyahunu məğlub edə biləcək durumda olduğunu göstərir.
Müsahibəsi zamanı Bennet İranla son münaqişəyə dair geniş fikir bildirib. O qeyd edib ki, Tehrana qarşı həyata keçirilmiş hücum “çox yaxşı” və “zəruri” qərar olub. Bennet vurğulayıb ki, həmin hücum onun 2021-ci ilin iyun ayında baş nazir olduğu dövrdə atdığı strateji addımlara əsaslanıb.
Qəzza ilə bağlı müharibəyə toxunan Bennet bildirib ki, 7 oktyabr 2023-cü ildə “HƏMAS” tərəfindən həyata keçirilmiş görünməmiş hücumdan sonra İsrail ordusunun Qəzzadakı fəaliyyəti “fövqəladə” olub. Lakin o, ölkənin siyasi rəhbərliyinin bu müharibəni idarə etmə tərzini “fəlakətli” adlandırıb.
Bennet hökumətin qərar qəbul etməkdə aciz olduğunu vurğulayaraq, Qəzzada girov götürülən bütün israillilərin azad edilməsini təmin edəcək “ümumi razılaşmaya dərhal nail olunmasını” təklif edib. O əlavə edib ki, HƏMAS-ın tamamilə məhv edilməsi məsələsi gələcək hökumətin məsuliyyətinə buraxılmalıdır.
Seçkilərlə bağlı suallara cavab verməkdən yayınan Bennet bildirib ki, o “hələlik namizədlər siyahısı hazırlamır”.
Qeyd edək ki, İsrail parlamentinin hazırkı çağırışı 2026-cı ilin noyabrında başa çatır. Lakin bu tarixdən əvvəl növbədənkənar parlament seçkilərinin keçirilməsi ehtimalı qalır.